陶傑在蘋果評論版（四月四日）講香港難免邊緣化，內裏提到鬼佬久居香港，學曉中國新移民之絕招，膽敢走出高速公路跨欄過馬路，證明鬼佬為咗搵錢，「中國化」話咁易，理鬼你甚麼英式法治，國際金融中心監管機制咩。陶傑素來觀察入微，唔敢話佢錯晒，畢竟晚清時代之鬼佬，喺上海實行官商勾結，賄賂貪污，以權謀私嘅情況，與中國官場作風完全相同。
地產Ｓ睇完陶傑篇文，諗咗一陣，飲啖茶之後，對左丁山講：「鬼佬在中國做生意，單打獨鬥嘅話，好容易中國化，同佢哋阿爺冇乜分別。但係大生意以機構對機構為主，私人影響力大唔過機構政策。舉個例，我哋係跨國公司，我知道晒我哋受倫敦紐約嘅商業倫理限制，唔可以中國化。因此在中國大城市，我哋只敢與外資銀行、外資企業打交道，做外資公司生意，因為外資對外資，一定冇枱底錢，冇紅包回佣呢回事，但與中國企業，無論甚麼行業，甚麼晒士，做生意嘅話，對唔住，回佣少不了，紅包人情冇得走，我哋邊度開到數呀，俾人捉到，公司國際聲譽受損，我一定冇得撈！」
外資跨國機構可以高薪高幹子弟為高層，利用佢哋嘅關係拉生意，但唔敢暗中送紅包，畢竟國際商業慣例以西方（主要係美國、英國）監管機制為準，在內地可能被逼妥協，但講到上市、貸款，點都係要以香港為中心，以普通法例為準。講到最尾，保護香港國際金融中心地位嘅，唔係曾蔭權，唔係任志剛，而係「美英帝國霸權主義」監管機構訂下嗰一套遊戲規則！
中國嘅話事權，在國際商場嘅影響力，一定逐漸增加，但另一方面，印度話明要開放外匯管制，盧比將來會自由兌換，將孟買建設成為南亞金融中心。有印度的benchmark，中國唔可以閂埋門自己話事，印度又係用普通法，英國規矩嘅，中國境內金融中心點樣仿效呀？