鄭中基（Ronald）的處男演唱會即將開鑼，他透露在個唱中至少表演四種樂器，一展音樂才華，更會與女dancer表演跳舞。Ronald回想曾有朋友笑他跳舞似機械人，故他誓要在個唱上一雪前恥。
將於本月二十一日在紅館舉行處男個唱的鄭中基，現正積極為演唱會的內容度橋。說到底是首次個人演唱會，Ronald強調不希望大眾的注意力全放在緋聞女友蔡卓妍或楊千嬅是否到場之上。
曾學跳霹靂舞
Ronald謂演唱會會以音樂為先，以實力作賣點，故將表演多種樂器一展才華，他說：「個個觀眾都係為咗我啲音樂而嚟，佢哋嚟唔嚟睇，我唱唔唱佢哋啲歌，都唔重要。其實我想話畀人聽我係實力派，等咁耐都係等今日啫！」
日前Ronald開會時還徇眾要求在個唱上表演跳舞，他搞笑地說：「呢個係我強項，公司同事話我應該跳舞，中學時代我學過霹靂舞，即係喺地下轉嗰種。演唱會上我會搵一班唔止係dancers咁簡單嘅女仔，同我一齊跳，但係乜嘢就要賣個關子。」
Ronald表示早前向朋友提到跳舞，對方竟叫他出場前要在額頭寫上四個英文字，他說：「我朋友叫我要寫S、O、N同Y四個字喺額頭，話我手腳咁硬，以前佢睇過我跳舞，話好似機械人，寫埋四個英文字就入型入格喎。所以我一係唔跳，否則一定要個朋友直竪拇指，一雪前恥。」
千嬅無暇捧場
Ronald透露屆時還會表演鋼琴、結他、打鼓和Bass，他說：「其實只係暫定表演四種樂器，𠵱家仲考慮緊表演其他樂器，例如敲擊樂。平時我對玩樂器都好有興趣，有時我喺錄音室見到啲樂器，自己識玩嘅話都會親自彈奏錄音。而我自己好想學打鼓，因為打鼓可以練節奏，亦因為要兩隻手分開打，所以都可以練右腦。」
此外，Ronald昨日到商台擔任《雲妮鍾情》嘉賓，他透露邀請了張學友、譚詠麟及陳慧琳擔任演唱會嘉賓，亦邀請了前女友楊千嬅到場欣賞，可惜對方屆時要到北京拍劇。問Ronald有沒有邀請緋聞女友蔡卓妍，他說：「有，我個個朋友都有叫，不過佢就未答我邊一場會嚟，總之我啲朋友都會劃一坐埋同一area。」
採訪、攝影：王連連、李珮洳
化妝：Yan 髮型：Horace@ChinG.
場地提供：通利琴行
