住大屋係唔少人嘅夢想，交成億稅嘅打工皇帝梗係會買豪門巨宅啦，一般小市民如果都想住得闊落啲，除咗過千呎豪宅外，買兩個細單位打通嚟住亦係好主意；又或者喺同一個屋苑，甚至同一座樓，連買兩個單位，一家幾代住埋一齊方便照應，亦係唔少有心有力嘅打工仔理想。
已打通叫價600萬
美聯區經梁雪梅話剛啱就有一個買家，一口氣買咗兩個將軍澳維景灣畔第7座兩房單位，等一家人住埋一齊，樓價合共565萬元，呎價分別3900幾同4200幾，算係市價啦。
梁區經話，其實呢類買家喺將軍澳都幾多，可能呢區有地鐵，兼且樓價相比外區仍算合理，以將軍澳南為例，除咗維景外，將軍澳中心同將軍澳廣場都好旺打孖買樓嘅成交。
另外，唔講唔知，原來維景相連戶亦特別旺場，因為無樓層限制，視乎景觀平貴都有人買。梁區經話𠵱家有20幾套相連戶放盤，1300多呎開價600萬，屬市價，係已打通或者由同一投資者持有嘅相連戶。如果由經紀幫你併合，想買兩個唔同業主嘅單位自行打通，低層有可能400幾萬元搞得掂，但畀到500零萬至可以多啲選擇。
電郵地址：[email protected]