大市直情好似食咗藥咁high，經紀黃前日提及的意馬國際（585），果然升到你唔信，昨日最高見過14元，收12.90元，再升17.3％，成交股數有204萬股，金額2638萬元。
另外，抽水浪潮持續，超大（682）大股東減持舊股，而公司則發行可換股債券，昨日復牌股價跌4.9％。跟住又輪到國美（493）在收市後抽水，大股東以每股8.90元至9.20元減持舊股，套現成11億銀咁多。話就話家陣市況大好，但各位老闆咁猴急出嚟抽水，好易嚇親人喎。
經紀黃話，雖然早前晨訊（2000）同海灣控股（416）都係大股東減持舊股，而股價依然堅挺，但今次超大同國美就唔同講法，尤其係國美，老闆已經唔係第一次減持套現，雖然今次配股，可以話係為咗維持足夠公眾持股量，但使唔使沽得咁急呀?況且昨日股價先抽高11.4%，配售價雖有折讓，但實際唔便宜，對國美後市表現唔樂觀。
慕容小初