舊年10月27日先喺香港上市嘅建行，噚日第一次公布05年全年業績，比前年賺多咗百幾億人仔，最開心嗰個，梗係董事長郭樹清，淨係睇佢喺答傳媒問題嘅時候，好鬼馬咁幽記者一默，就知佢心情有幾咁靚啦。
話說喺答問期間，有記者唔覺意叫錯咗佢做郭行長，郭樹清即刻好鬼馬咁話，呢度得郭董事長，或者常（振明）行長，冇郭行長喎，你究竟想問佢定問我呢？之後有人問佢，對業績嘅數據有乜評價？佢就一本正經咁話，對所有數據都好滿意，但有好多不滿嘅事情，都冇喺數據反映出嚟……一時鬼馬，一時正經，你都冇佢咁精靈。
郭樹清喺05年3月先走馬上任，係南開大學哲學系高材生，又係法學專業博士，仲做過牛津大學客座研究員，空降建行之前，做過人行副行長、國家外滙管理局局長、匯金董事長、貴州省副省長、國家經濟體委會改革委員秘書長等，雖則身經百戰，但返咗建行200日鬆啲，間行就上市，之前又爆單大醜聞，你都咪話唔憂心。
建行係四大國有銀行之中，最早改制上市嘅，集資規模係銀行業中到家吓都係「冧巴溫」，亦係近呢5年嚟最大規模嘅公開招股活動。今次派成績表，真係個個都昅到實一實，家吓成績總算見得人，難怪佢咁風騷！
李華華
讀者如有任何意見或報料，歡迎發送電郵至[email protected]。