要數SNK名作，《拳皇》以外就要數到《MetalSlug》系列，最近街機新推出嘅《MetalSlug6》，當中登場6名角色之中，有2名就由《拳皇》過來作友情客串，而且唔係得個樣，每名角色都有獨立能力值，玩起來操作變化就唔會咁單調！
記者：許福合
攝影：周旭文
由SNK推出嘅《MetalSlug》系列，可以話傳統橫向動作遊戲代表作，經典地位可算緊接《魂斗羅》！剛剛推出到第6集，廠方仍保留系列特色，加入大量可乘坐嘅裝甲車、戰車等，造型古怪兼攻擊力爆燈！最吸引都係同自家另一王牌《拳皇》玩CrossOver，加入兩名「撻技」軍佬Ralf同Clark，夾埋本身4名角色，令到遊戲變化更大！
傳統玩法角色誇張
開始遊戲時，玩家可以由6名角色之選擇，若選擇《拳皇》2名新角色，只要同按A及D掣，就可使用好有格鬥味嘅必殺技。若然可以配合動畫出招，咁就玩得過癮好多。筆者喺旺角新之城玩《MetalSlug6》，一局2蚊，亦唔算太難玩。以操作計，新作同上幾集無咩大分別，不過敵人角色設計依舊誇張，尤其係首領級，包括巴士機械人混合體、超巨大UFO等，而敵人出現密度亦唔低，玩多陣就會三五成群咁出現，邊射邊跳都幾手忙腳亂。最重要係救人同執寶物，有時仲可以拎到重型大炮，一炮就可清除敵人，慳時又省力！
搵戰車做掩護
遊戲過癮之處，係可以乘坐各式各樣嘅戰車，當見到某交通工具有個箭頭出現時，即代表可以坐上去，執住周圍走之，戰車嘅裝甲仲可提高保護能力，即使中多幾炮都無咁易死，同時又可利用戰車上重型武器殺敵，所以見到就唔好錯過。有玩過前作嘅機迷，可能會記得第4、5集中曾登場嘅兩腳戰車，今集亦會再度出現，最大優點係可使用激光炮殺敵，基本上一槍滅一隻嘍囉，戰鬥力相當唔錯！
PROFILE
遊戲類型：橫向動作
對應機種：街機
遊玩人數：1至2人
開發商：SNK
價錢：每局$2
