別以為買BB用品就同平時Shopping一樣，見靚就買，查實都有好多學問，應揀選哪種質料？哪種款式衫仔適合初生BB穿着？還有一大堆清單有排你買，想買得合適又不會買漏，今日就等剛為人母的Joko帶你去Shopping順便教你點揀點買。
記者：黃婉冰
攝影：楊錦文
Model：Kenny（Salvador）
照單全執免錯漏
JokoProfile 2X歲
簡介：初為人母，最叻買BB嘢
丁丁Profile 8個月大
簡介：識食又識享受
第一次做媽咪當然緊張，很多準媽咪還會在一知道自己懷孕後就即刻四出搜羅所有BB用品，但其實買BB用品不宜過急，啱啱做人媽咪嘅Joko就有以下提議：「我見過有啲媽咪好緊張，淨係奶樽都買成二十幾個，其實買BB用品千祈唔好急，好似尿片同奶粉咁，可以在診所攞啲試用裝試用吓，試啱先再大量入貨都未遲。如果驚買漏或者買錯，可以先上網搵齊資料，然後列張清單出嚟，再照單全執，我當時都係咁做，所以一日已經買齊晒。有啲百貨公司仲會幫你執埋，夠方便！另外，買BB用品特別是衣物，要留意番個季節，當時我係懷孕到咗5、6個月先買所有BB用品，一來知道佢出世個季節，二來照過超聲波，知道佢係男仔定女仔，呢個時候就會知道應該買咩衫仔畀佢着。」
沖涼盆宜預大少少
Joko：「呢款沖涼盆好在中間有個位凸起，水位無咁高，唔怕浸親佢，加上有塊防跣膠，我可以枕住隻手幫佢沖涼唔會跣。」
丁丁小Tips
「買時記得個Size要預大少少，第時我大個都啱用。」
Check！日常用品
奶樽不宜太花巧
Joko：「呢款奶樽中間有條膠管，有助將裏面啲風帶走，減低BB飲奶時吸入過多的空氣，可以減輕飲奶後嘔奶的程度。」
丁丁小Tips
「媽咪話奶樽唔好貪得意買樽身有咁多公仔，因為顏料可能會釋出有害化學物質。」
柔軟毛巾
Joko：「BB皮膚好嫩同敏感，抹身嘅毛巾一定要100%棉質，質料柔軟唔會整痛BB。呢套有埋手套，可將沐浴露塗得更加平均。」
紗巾抹口水
Joko：「紗巾係抹嘴用，質料軟熟唔會甩毛線，抹口水用唔會刮損皮膚。」
Check！BB衣物
全棉打底內衣
Joko：「要視乎BB出世的季節，要揀全棉質料，款式以和尚袍、側邊綁帶的最好，方便幫BB穿着，新衫買返嚟之後最好先用BB洗衣液洗一洗，咁就唔怕有細菌同污糟。」
丁丁小Tips
「其實我哋體溫比大人高，所以底衫唔使太過厚，毛毛令我哋敏感，就算買羊毛衫，裏面都要係棉質。」
帽仔護頭
Joko：「BB剛出世未能適應周圍環境同溫度，幫佢戴番頂帽可以避免個頭仔受外來刺激。」
Check！BB護理用品
照顧嫩滑肌膚
Joko：「BB專用沐浴露性質天然，唔會刺激佢哋啲皮膚，亦唔怕造成敏感。呢款用棉葵植物萃取精華，性質溫和，香味無咁濃烈，啱初生BB用。」
脫脂棉花唔甩毛
Joko：「用脫脂棉花球抹BB面，脫脂棉無咁多化學物料，唔會引起皮膚敏感或刺激皮膚。」
丁丁小Tips
「普通棉花會黏到我成塊面都係，脫脂棉軟滑又唔會甩毛。」
必買清單
1.奶樽
2.奶粉
3.尿片
4.透氣換片墊
5.BB用濕紙巾
6.BB用護膚膏
7.BB用洗衣粉
8.BB用沐浴露
9.奶樽消毒器
10.BB床
11.BB車
12.毛巾、紗巾
13.沖涼盆
14.脫脂棉花球
15.衫仔
16.帽仔
購物小貼士
1.懷孕5-6個月，知道胎兒性別才開始買衫仔。
2.要清楚知道嬰兒出世的季節而選購適合的衣服。
3.衣料要選100%棉質的以保護BB幼嫩肌膚。
售賣點：
（a）Chicco尖沙嘴海運大廈地下OTG10店（23773369）
（b）西田百貨沙田正街2-8號新城市廣場第三期二樓（26941111）
懷孕37周：胎兒身長：約45-48cm 體重：約2至2.5kg
胎兒變化：生殖器官基本發育完成，內臟也近乎完全完成，肺和腸已很發達，已具備呼吸能力。
媽咪變化：由於子宮底逐漸上升，胃、肺、心臟受到壓迫，所以會出現呼吸急促和心悸的情形，甚至有胃脹、無食慾，分泌物亦會增多。子宮會壓迫膀胱而產生尿液，分泌物同樣會增多，下腹和大腿關節會出現僵硬感。