9樓D座：大書架做掩飾　廁所唔見咗

以前睇粵語殘片，石堅每次遇上曹達華追捕，一推開個書櫃，就會有條秘密通道俾佢走佬用。估唔到，現實真係有人間屋用同一個方法去做掩飾，唯一唔同嘅係，屋主要掩飾嘅其實係廁所，並非甚麼秘密通道。此外，全屋還有很多估唔到的設計，想唔想見識見識？即刻帶你走一轉。

記者：黃婉冰
攝影：何家亮

書架掩眼法

■桃木大書架放滿Jason和太太最愛的Angel公仔。

拉開書架，廁所現形！

「你點會買呢間屋㗎？」縱然在當初拍板買下這間屋時，老婆大人稍有微言，但屋主Jason還是很有信心可以把這千呎唐樓居室，變成心目中的moodyhome。

■Giotto設計的木廚櫃，簡約得來幾有格。

「Raw」居機關重重

果然，經過四個月的悉心打扮和Jason花咗不少心血，這間舊屋搖身一變成為一間溫暖「Raw」居。「我最緊要係間屋要有一種舒服而自然嘅感覺，所以揀咗桃木同磚，營造出一種好moody，好raw同warm嘅感覺。」
第一次到訪Jason家，感覺新鮮又好玩，試問有誰會想到拉開書架，廁所就會出現？客廳眨吓眼就變成客房，感覺有如電影「黑玫瑰」中的重重機關，外人如我看來只會覺得很新奇，但其實是有特別原因。「如果道牆個書架隔籬無端端又多咗隻門喺度，望落好怪，個書架又會變得好細，所以我所有房門、廚櫃門都唔會有手把，望落唔會咁突兀，順眼好多。」
還有一樣最意想不到的，就是其地板，驟眼看還以為是一塊塊鑲滿生銹螺絲的柚木地板，但再望真少少，原來只是一塊塊扮柚木地板的地磚，而且磚下仲鋪滿了floorheater，一到冬天，開動暖氣，腳下就會傳來陣陣暖笠笠的感覺，「我老婆話最鍾意係冬天沖完涼，腳板暖笠笠，好舒服。」嘩，咁多埋伏，真係唔講唔知！

■購自Indigo的仿古木枱，加上地燈的柔和燈光和磚牆，夠晒氣氛。

客廳變客房

■Jason利用綠色、木色和金色營造出一種舒服又自然的感覺。

■將兩邊的垂直風琴簾拉埋，客廳即時變成客房。

用天然光線營造氣氛

很多人設計新居，都會集中力全放在家具、擺設和間隔上，但Jason剛好相反，他會先從lighting方面着手，然後再配上合適的布置。「另一樣我最注重嘅就係全屋光線，我要全屋光線都好自然，所以我特別揀呢隻叫樂思富嘅纖維布簾，佢可以調校唔同角度，等啲陽光可以透入間屋，營造出一種好warm嘅光線之餘，外面又唔會望到我間屋，而且呢種簾可以隔埋紫外光，啲光好soft，配合埋其他燈光，同樣可以營造一種好warm嘅氣氛。」