今年結婚人數創新高，市場都打呢批客主意，有啲代理行高調咁話今年係上車盤嘅天下，但國際測量師行仲量聯行就有另類睇法，認為中上價樓至係今年樓市焦點。
仲記話舊年樓按利息上升3厘，令到「供樓」成本高於「租樓」，再冇「供平過租」呢支歌唱，部份家庭於是放棄買樓，改為租樓，即係話買家少咗啦。
另一方面，有人工加嘅家庭，以高收入階層為主，呢班人會因入息上升而諗換樓，同時又唔會好着意供樓係咪貴過租樓，當佢哋換樓嘅時候，自然會放售手上單位，於是啲「較低檔次」單位供應多咗，壓抑中小型住宅樓價升幅，令中小型住宅售價跑輸畀租金。
咁仲記嘅結論係，今年整體住宅租金升得多過樓價，買賣就集中喺中高檔市場。
不過，掉番轉頭正面啲諗，中小型樓價表現落後，即係代表用家有入市機會啦。