畀阿孻仔檔Sunday威完一輪後，超人檔3仔終於有新搞作，噚日一炮過公布，同日本仔NEC完成咗3.5GHSDPA技術測試、推部新嘅尊貴版視像3G機LG890，同埋推出全新廣告。華華覺得廣告最正，終於唔用「拆彈明」同埋佢師妹「喪笑蘭」，令人耳目一新。
呢一轉廣告由一個叫Justin的八歲豆丁擔正，小側田帶住成班小朋友演出，啲戲唔錯㗎，而配音嘅人真係估佢唔到──係人大阿姐個家英哥！3仔嗰邊話，揀家英哥因為香港廣告片嘅配音來來去去都係嗰幾把聲，想搵把搞鬼啲嘅聲等大家冇咁悶……真爆笑，如果唔望住電視機齋聽家英哥講：「仲唔快啲換3？」華華會以為係桑拿揼骨嘅廣告。
3仔呢排又有乜近況？佢哋消費市場業務總監龍佩英話，客仔數目經已過咗50幾萬，市場佔有率有成75%，總之係「香港最多人錫嘅網絡」……唔知二少點睇？