噚日金手指孫兄問利世民︰「你話同讀者講香港合法開賭，係咪想講嗰啲發過豬頭嘅輪商呢？」各位聰明嘅讀者，相信孫兄估到，你哋冇理由估唔到啩？
唔知係咪中國人有鋪小農嗜賭DNA，其實小小嘅香港已經係世界上交投最活躍窩輪市場，叮噹馬頭嘅就係大陸。舊年8月上海推三隻輪，12月深圳又推三隻輪，單係呢六隻輪嘅交投已經接近60億人民幣，比起香港千幾隻輪每日平均交投先得40零億，睇個勢大陸做世界最大賭場指日可待。
嚴打出千
當然小投資者冇可能使出「發輪功」，不過就可以「投資」呢個概念。大家試諗吓，濠賭股都唔係隻隻有賭牌開賭場，有的只不過做吓叠碼仔，叫做搭吓濠賭概念順風車。𠵱家就有個真正嘅「豪賭」概念，點解冇得炒先？利世民建議大家考慮吓證券業概念，當正佢哋係窩輪叠碼仔，加上呢轉炒大陸概念，重要大陸人民幣氾濫，一升起上嚟真係有如神舟X號咁，成為人民嘅英雄偶像。
其實賭呢家嘢，以前係「英皇御准」嘅高尚活動，我實在唔應該戴有色眼鏡去睇啲賭徒。利世民最擔心者，係唔知幾時明光社之流一班衞道之士去證監會示威，咁香港真係國際笑話矣。不過話時話，早排證監話要加強規管云云，真係曾經一度令小弟擔心不已，好在最後證監都深明大義，象徵式出兩招就算，算佢啦！
如果窩輪市場似賭場，證監可以做嘅只有嚴打出千，假如輪商故意操縱流通量影響市價，呢啲同出千有乜分別？
此外，利世民就認為證監都唔應該管。好似回佣畀經紀行，呢啲只不過好似賭場用折扣價賣泥碼畀叠碼仔，其實真係冇乜問題。大家又點睇？
利世民