商台DJ森美，口齒伶俐擅搞氣氛，不過在屋邨長大的他，童年卻很怕事，每遇上三五成群的童黨就怕得立即閉上眼，以免被指「眼睥睥」而捱打。可是面對母親，森美又回復窒人本色，一次母親準備給他「藤條燜豬肉」時，他竟說：「神都未夠膽打我呀！」
森美小時候居住在葵盛邨，由於極度害怕遇上童黨，所以不太喜歡在街上流連，即使到屋邨樓下的公園仔踏單車，只要遇上三五成群的細路，他第一個反應就是閉上眼，盡量避免跟對方有任何眼神接觸。
尖嘴掃平貨
森美說：「你唔好睇我𠵱家把口成日窒人呀，其實我細個嗰陣好怕事㗎，每次落街踩單車，一見到幾個比我大嘅人行過，我就一定唔敢望，因為我好怕佢哋話我睥佢，之後就兇我『仔，睥乜呀睥！』到時打我咪死？」
雖然森美小時候最怕童黨，不過在母親面前又會流露其伶牙俐齒的本色。由於森美選讀天主教小學，有次他被母親責罰，快遭「藤條燜豬肉」時，森美竟然對母親說：「神都未夠膽打我呀，你憑乜嘢資格打我呀！」當然最後還是逃不過被打的命運。
森美自言幼時很貪靚，小小年紀已非常注重衣着，還懂得配襯衣服，但每年只有農曆新年才有機會買新衫。他說：「以前過年前一定會去美孚一間專賣童裝嘅舖頭入貨，如果唔啱心水嘅話就會轉移陣地去位於旺角嘅美思百貨買喇！」
才升讀初中，森美已經懂得相約堂兄到加連威老道一帶的出口店置裝，再到文化中心互相拍照留念，愛美程度絕不比女孩子遜色！
撰文：李珮洳
部份圖片提供：森美
