雖然大陸汽車股好多都唱極唔起，但大陸汽車零件股就幾乎隻隻都掂，尤其係北泰（2339），前日再升5.37％，收3.925元，創下上市新高。
經紀黃話，近排有唔少證券行探訪過北泰，跟住都出報告力推。現時芬佬周圍搵嘢買，有證券行唱好的股票，要炒上當然事半功倍。
證券行睇好北泰並調升其目標價，主要係北泰自去年11月開始生產懸架系統同減振器，而公司產品更由以往主要做出口，發展至喺大陸做埋內銷，據講北泰將於短期內同大陸的汽車生產商簽訂供貨協議。
由於北泰做埋內銷，沾上內需股概念，芬佬自然會加分，將佢秤高啲。
另外，經紀黃日前推介的天虹紡織（2678）公布業績，盈利增長32％至1.8億元人民幣，兼夾派中期息每股6.5仙。但消息一出，股價居然一度跌至1.65元，收1.71元，跌5％。
經紀黃話，天虹雖然盈利增長唔錯，但就冇預期中咁勁，有芬佬沽貨抗議。
慕容小初