香港久唔久就有啲騎呢論點，最新一個就係「邊緣化」。
單係睇個股市，踏入2006年，啲中資股炒到七彩；去到第二季諗佢會回一回，佢就破埋萬六大關，大有挑戰千禧科網熱潮時嘅高位之勢，日日三百幾億成交，連蔣大炮都投晒降。香港政府成日話自己係金融中心，咁點解金融中心咁旺，都會「邊緣」？
其實要驚就二千年時驚啦。諗番起當時科網泡沫爆煲，但中國大陸就冇事噃，上海深圳股市幾乎冇受影響，大家都擔心佢哋趁住香港病攞你命，一舉取代你，到時個中心在上海，香港想唔邊緣都唔得。
但係六年過去，雖然有沙士，又有董建華，重有大遊行㖭，但各地投資者冇驚噃。特別係祖國啲頂級企業，佢哋唔怕香港有咩政治內耗、有咩政黨紛爭，一於衝晒落嚟掛牌，香港股市集資額年年創紀錄（呢個現象，亦都令到另一個早兩年成日吹嘅騎呢論點──政治爭拗會影響投資信心──不攻自破）。
香港唔想俾人邊緣，其實好易。只要啲官老爺唔好事事插手，唔好咁多利益輸送；香港市民齊心維護司法獨立同言論自由，咁就唔使驚，放心去炒番鋪，睇吓呢個中資泡幾時爆。
李華華
讀者如有任何意見或報料，歡迎發送電郵至[email protected]。