楊恭如與張智霖昨日聯同范冰冰及鄧健泓，為無綫宣傳他們去年在上海拍攝的內地劇。恭如直認無綫未有邀請她演出，反而離巢多時的張智霖就識趣地表示有追看劇集《鐵血保鏢》，更明言有興趣再為無綫效力。
楊恭如自當選亞姐以來，昨日首度出席無綫宣傳活動，並聯同張智霖、鄧健泓及范冰冰到中環麗嘉酒店出席劇集《美麗新天地》首映會。該劇將於本月十七日在無綫收費電視劇集台播出。
床戲各有各瞓
首次出席無綫宣傳活動的楊恭如被問到無綫可有斟洽她演出時，她說：「冇喎，套劇係舊年四月喺上海拍嘅，我拍嗰陣係講普通話，𠵱家喺香港播，會有人幫我配音。」恭如還大爆在劇中與張智霖有床上戲，不過她補充謂：「我同張智霖係各有各瞓，反而冰冰同佢會激啲。」
張智霖離開無綫多時，昨日即爭取機會賣口乖說：「TVB有搵我拍劇，遇到啱嘅劇本，我都好想同香港觀眾見面。呢排我都有追《鐵血保鏢》，好鍾意睇黎耀祥同郭鋒。」
被問到會否與女友袁詠儀趁今年好年拉埋天窗？張智霖只說：「今時今日大家嘅關係已經好穩定。」此外，鄧健泓表示現正努力學習普通話，還興致勃勃地說：「為咗學好普通話，最好都係識番個上海女仔啦！」
採訪：卓美娟 攝影：陳偉權
