3月對代理業嚟講係美好嘅月份，因為捱咗幾個月之後，業績終於見曙光，有番啲盈利。美聯嗱嗱聲報數畀蘭西，話有37間分行生意額過百萬，係4個月嘅新高。
喺呢37間過百萬數嘅分行中，最叻係山頂分行，營業額逾500萬，比第二位嘅300萬贏成條街。呢間由唐志傑負責嘅分行，威水史包括促成4間獨立屋成交、5間大潭陽明山莊買賣，單月生意額逾3億。
呢排逾千萬豪宅買賣日日有來，睇嚟呢間分行今個月好大機會冧莊。
美仔對手中原都搞啲嘢嚟鼓勵士氣，就係將10個區經升為助理區域營業董事，中記話呢班係公司嘅「靈魂人物」，立下好多汗馬功勞，升職係應該嘅。一次過升咁多人，遲啲咪又要升一批員工做區經囉，音樂椅遊戲睇怕都未玩完。