只從孫柏文隻金手指喺3月6日開始日日同大家見面之後，fan屎數目有如幾何般咁升。「幾何般咁升」點解？即係嗰種德信佳/盈科數碼動力，仲係1186從98年至00年嘅升幅。我fan屎數目升嘅原因好簡單，就係我呢一種對實貨白銀不離不棄嘅態度，夾住嗰種白銀日日創新高（anotherday，anothernewhigh）嘅氣勢。
不過呢個香港特區，一個人fan屎多嘅時候，就自自然然會出現一啲患「紅眼症」嘅人。患病嘅病人，其中一個最明顯病徵，就係運用佢嘅專欄「提點」他人嘅論調同建議。其中一個最嚴重「金氏紅眼症」嘅病患者，就係隔籬《利字當頭》一欄嘅總舵主利世民兄。而佢對我隻金手指篤出來咁多個建議，最唔likey嘅係我建議大家買白銀，不過可能要揸十年。總結世民兄對孫柏文嘅提點：「十年？你嘅投資建議，分分鐘連香港都有民主，你嗰個都可能仲未派彩呀。」
所以為免又有七十幾歲嘅長者，帶有七分失望同埋三分希望，喺本欄隔籬周圍登全版廣告，問小弟一句：「在我有生之年，我會見到放白銀的一天嗎？」今日，孫柏文就想用隻金手指幫大家篤一項可能在兩年之內，將大家嘅本金翻十番嘅投資。
我嘅建議，就係大家做半成按揭喺加拿大阿爾伯達省（Alberta）買樓。大家都知道，世界石油需求增加，好大程度上係中國同埋印度嘅高速增長。而世界石油嘅後備供應量，根本就係零。所以每一次有一個中國或者印度人，想買多一公升油，佢就要托高個價，去搶人哋已經用緊嘅油。當價錢愈來愈高，就自然會有人想將石油供應量推高。咁喺呢個世界，最有本錢增加石油供應量嘅地方，就係加拿大阿爾伯達省嘞。佢哋有一樣叫做「油沙」嘅嘢，油沙以前唔算有供應石油嘅潛能，因為開發所需要嘅成本實在太高。要抵銷開發成本，油價必須40美元一桶以上。不過呢幾年來，油價真係徘徊喺40美元一桶以上，所以愈來愈多油沙嘅發展項目上馬。
企業發展油沙項目需要大量工程師同普通工人，雖然佢哋已經喺同行高薪挖角，不過都仲喺叫苦連天話請唔到人。人工就自自然然攀升，亦可見到消費力非常之強。大家自然會問，市場應該知道，人人有工做，人工又高，又可預見到大量人才移民去該省，所以樓價應該已經升晒？不過，金手指叫大家喺阿爾伯達省買樓嘅主要原因，就係因為買樓嘅人唔相信油價可以維持。阿爾伯達省市民，個個都帶着八十年代中，石油泡沫爆破令到樓市仆直嘅陰影，所以我覺得仲有排升。我相信，阿爾伯達省樓價會喺06、07每年升20%幾，乘埋有60%，如果大家做九成五按揭，咁本金咪可以翻十番囉！聽日，就分析邊個城市嘅樓好買。
孫柏文