導演劉偉強：「華仔要由細演到老，喺演出嘅角度嚟睇，佢有充份發揮機會，個角色又唔易做，但佢演得恰到好處。至於梁家輝喺《黑社會》演出同《黑金》太似，所以我唔睇好，而《長恨歌》嘅表現唔係唔好，但戲份太少會較蝕底。」
曾志偉：「家輝好戲係大家認同嘅，但佢入圍嘅兩部戲中，好明顯佢喺《長恨歌》嘅演出係比較有難度，而佢又演得收放自如，所以憑呢部戲贏面會較大，因為佢喺《黑社會》嘅表現唔算話有好大驚喜。」
編劇鍾繼昌：「任達華個角色其實好難做，佢要由開頭嘅深沉變成一個你估唔到嘅殘暴江湖大佬，佢嘅演出係層次分明，觀眾發現有好大對比，唔係一般演員可以演到層次分明，所以我覺得佢得獎係實至名歸。」