動輒過萬蚊一呎嘅豪宅，買家非富則貴，為求令人覺得物超所值，發展商用盡一切豪華包裝攻勢、各式市場推銷策略，攻陷買家芳心。
長實最近再次落力推銷大坑名門，噚日清明節假期，副首席經理黃思聰都唔放過硬銷機會。由於個樓盤仲係樓花，又未入伙，發展商惟有喺售樓處向傳媒講解名門住客會所有幾豪華。
香港史上最貴
可能住得起呢類萬萬聲一呎豪宅嘅住戶，全部係上流社會階層，個個出身名門望族，所以連佔地4.6萬呎嘅會所，都要叫「名門聚」。黃思聰仲話花成3.6億興建，誇口係全港有史以嚟最貴。
有乜咁巴閉？佢話淨係入口大堂都用咗2200萬，水晶吊燈當然唔少得，但名門盞水晶燈就零舍巨型，成30呎乘15呎，有成3層樓咁高，用咗8000粒施華洛世奇水晶，仲採用LED（發光原體二極管）高科技創製，透過控制光度折射，可以喺水晶燈上面拼砌字體。
為咗與別不同，仲專程喺意大利搜羅一批藍寶晶萬年透光石鋪砌大堂牆身，聽講淨係鋪牆都使咗成千萬。查實住客大堂只係返屋企路經幾分鐘咁多，搞到咁豪華，都係滿足虛榮感啫。
電郵地址：[email protected]
