無驚無險，恒指先兩日升破萬六點，假前收報16100。市場錢多，搵嘢買，落後嘅大隻銀行股會成為焦點。
滙控（005）與中銀（2388）就嚟有運行，而且係大運嗰隻。搵相關C輪炒，順便搵埋復活節使費。
滙控C輪2228：滙控前周三除息2.41元，跌咗一輪，落到129.10元，前日收131元，折合除息前133.41元，仍然低過除息前幾日最高價134.30元。大行近日紛紛睇好滙控，高盛出報告，最新睇法係滙控目標價153元。滙控上到153元，06年PE都只不過係13.5倍。睇吓其他銀行股尤其係國內銀行股嘅升勢，滙控相對落後，抵買到極。
揀滙控C輪埋手，諗吓2228。隻輪7月初夠鐘，輪價55仙，溢價1.2%，槓桿率23.8%（有效16.7倍），引伸波幅12.4%。未來3個月，滙控如果上到153元，隻輪值2.60元。
條數好易計，正股153元減行使價127元，除番10，就係隻輪理論價。
中銀C輪9068：中銀周二異動，由15.70元以大成交升上最高16.05元，收15.90元，升0.20元，氣勢轉強，擺明去馬格。
買C輪有得諗，正路之選係9068，6月尾夠鐘，輪價99仙，負溢價0.2%，槓桿率16.1%倍（有效11倍），引伸波幅21.1%，數據靚極。
章盛