做生意就梗係顧客至上，個客要乜就畀乜佢，之不過國內電視生產商Konka（康佳）營銷事務部總經理楊國和（圖）就話，客人要嚟嘅就自然會嚟，要走就點都留唔住，所以啲貿易展銷會佢一次都冇參加，淨係擺產品出嚟，亦誓死唔報價，就算有客問都唔講，點都要對方留低卡片之後再聯絡，唔制？咪你走寶囉！認真夠薑。
楊國和對顧客瀟灑，對員工流失呢個問題就冇晒符，尤其係啱啱大學畢業嘅新人，流失率鬼咁高，搞到佢要同初出茅廬嘅新職員簽六年賣身契，問題先可以解決！
快人快語嘅楊總係湖北人，但佢話自己好唔鍾意啲同鄉，事關佢哋唔團結。至於香港業務，佢話公司計劃三年內上市，但之後又補咗句──其實三年後仲好，可以多啲時間發大嚟搞，兼且揀吓投資者。乜都畀佢噏晒！
喺商場做生意，楊國和奉行冇永遠嘅敵人，只有永遠嘅利益，只要條件合理，價錢啱心水嘅話，就乜都得，話之你是友是敵，有錢賺至係最實際！