即時戰略遊戲之中，都有分唔同類型，有古典出名嘅《AgeofEmpire》，若然要玩最新科技武器，《ActofWar：DirectAction》會係相當唔錯嘅選擇，事關論武器、兵種之齊全，實非一般遊戲可比，再加上今次推出資料片《HighTreason》，加入更具氣勢嘅大海戰同僱傭兵系統，玩得必然更過癮。
記者：許福合
新資料片《HighTreason》除咗加入最新武器外，單機版玩法更豐富，其中之一係玩家可以自行製作地圖，敵我陣營點鋪排自己話晒事，而地圖經連線後，就會自動分享到對戰玩家嘅電腦上，即係不斷有新地圖玩！
海上大會戰
今集最正係加入海戰系統，由於設定上實在太完善，進行遊戲時戰略玩法與陸戰有好大分別，單睇海戰嘅作戰單位，就多達10種以上，好像航空母艦、潛艇、各種類型直升機、戰鬥機等，為咗務求真實，遊戲真實程度相當高，玩家應將航空母艦、潛艇及其他戰艦組成戰鬥群，事關空母雖然有強大作戰能力，不過目標實在太大，好易成為敵人目標，海戰時應多注意各戰鬥單位位置，要隨時可協防為上。操作上其實同過往差唔多，只係新加因應新兵種而設嘅下潛、掃雷等指令，畫面逼真程度更高，當發現海面出現波動效果時，可能有魚雷、甚至係戰斧巡航導彈接近，要盡快防禦。
炸美國白宮最過癮
之前都有玩開呢隻Game，今集最吸引我之處，梗係攻打美國嘅任務啦！揸住架飛機衝去華盛頓，跟手喪炸白宮，將殊仔炸成薯條！
加入新兵種
當危急時叫救兵，可以話係新加特色，不過當中有唔少限制；同一時期內，只有一個參戰國可以叫兵，而支援兵種其實係以僱傭兵性質參戰，要有好幫手就要出得起錢，而且同時要畀一大筆保險費，當僱傭兵受傷或被殺，保險費就會自動扣除一定金錢作安家費，所以係有錢人先玩得起。不過僱傭兵作戰能力確實厲害，分為9個兵種之多，最好用就係配備隱形轟炸機嘅部隊，輕易就可破壞敵人中心，實用性極高。玩過今集之後，除咗各種新武器，最有印象都係電腦變得更聰明，作戰能力更強外，電腦更會識得計算資金投資方向，同一個「真」玩家無分別！
PROFILE
遊戲類型：即時戰略
對應機種：Windows
遊玩人數：1至8人
開發商：EugenSystems
(C)2006Atari,Inc.AllRightsReserved.
