抽水集資浪潮持續，昨日輪到天安中國（028），隻股收市後，以每股5.10元配股，集資幾億銀。
近期有唔少股仔在配股後，股價走勢硬淨。例如前日經紀黃話唔使擔心嘅海灣控股（416），就算係大股東賣舊股套現，但昨日股價不知幾硬淨，大升5.47％，收3.375元。但經紀黃就話天安情況有別，對配股後表現有所保留。
天安今次炒上配股，升勢相當急，聽聞好多芬佬都收到電話被問要唔要貨，同前日上海復地（2337）三扒兩撥就搞掂大有分別。
另外，06年神仙股意馬國際（585），雖然有兩名董事減持股份，但股價不跌反升，昨日再升3.29％，收11元，再創新高。
經紀黃話，佢到𠵱家都唔明點解電腦動畫概念會咁勁抽，但據講在芬佬界中就相當受落，傳聞隻股目標價一再調高，誇張到難以置信，現價高處未算高。
慕容小初