代理呢行門檻唔高，唔少覺得自己嗰行冇乜前景嘅人，都會試吓轉做代理博一鋪，當中有啲就咁踏上青雲路，尤其呢幾年代理行大事擴充，為前線提供唔少上位同年賺過百萬嘅機會。
食正升浪上位易
例如做咗髮型屋東主12年嘅馮康，因為同其他股東意見分歧，95年退股轉行做代理，食正樓市升浪，先後做過細行嘅董事同大行嘅區域經理，試過兩年搵到200幾萬；加埋自己嘅投資，就有500幾萬落袋，仲喺天水圍嘉湖山莊買咗佢第一個居所㖭。
馮康今年2月轉投香港置業，做新元朗中心分行區經理，負責開拓屯門同元朗區，𠵱家管緊兩間分行一共30幾人；遲啲會再多一間分行開張，管轄嘅範圍進一步擴大。佢話要為未來十年嘅前途搏殺，為自己開創新局面。
講開港置，母公司美聯集團今年勢頭幾勁，第一季喺一手市場嘅成績唔錯，喺7個一手盤銷售比賽中贏咗對手，加上工商舖都有出色表現，所以主席黃建業就預備咗一批「皇者戰衣」，送畀表現出色嘅董事，全公司總共得8個人有資格攞呢件戰衣咋。
電郵地址：[email protected]