張文慈（Pinky）家有一姐和兩個弟弟，雙親早已離異，Pinky由祖母一手湊大。四姊弟活潑好動，經常損手爛腳，三弟更因車禍而幾乎送命；Pinky亦試過攀上櫃頂偷吃，結果跌傷下顎，血流如注。由於意外多多，祖母和爸爸亦習以為常，每逢意外都表現鎮定。
張文慈生於小康之家，共有四姊弟，Pinky排行第二。父母在她年幼時已離異，四姊弟就交由祖母照顧。為了答謝祖母養育之恩，Pinky表示會盡努力，讓祖母安享晚年。
為食跌傷顎
談到童年趣事，原來現在身材標青的Pinky，小時是個大食B，更因為貪吃之故，令下顎留下一道永不磨滅的疤痕。Pinky回憶說：「事發嗰晚係年三十晚，嫲嫲可能一早預咗我為食，所以特別將全盒放喺櫃頂。我夜晚等大家瞓晒覺，就靜雞雞擔張櫈仔企高偷嘢食，點知跣腳跌咗落嚟，仲跌傷個下顎，當時流咗好多血。」
雖然當時Pinky血流如注，但祖母仍處變不驚，Pinky笑說：「因為我屋企係愛登士家庭，幾姊弟都成日發生意外，所以嫲嫲同爹哋見慣見熟，每次都會好鎮定處理。」
初三遇車禍
Pinky為食惹禍已屬小事，最難忘是某年年初三，她與三弟上街，弟弟突然衝出馬路被車撞倒，登時把Pinky嚇呆，她說：「我當時好驚，因為怕冇咗個細佬，事發後即刻通知爹哋去醫院，爹哋本來期期買同一組冧把嘅六合彩，但因為去咗醫院，所以買唔到六合彩，結果真係開彩，爹哋就錯失咗呢個中獎機會喇。」
採訪：比華利
圖片提供：張文慈
