工作忙碌晚晚寫稿寫到凌晨三點三，個肚餓到咕咕聲都未有飯到肚，呢個時候最想就係食番啲熱辣辣嘅小炒。上星期揸車經過土瓜灣，發現一間食店外泊滿的士，入面仲人頭湧湧，行入去發覺牆上密密麻麻貼滿唔同的菜式，款式多而且又新奇。
記者：曾靜茵 攝影：楊錦文
菜式常新絕無悶場
雖然門外寫住榮豐粥麵茶餐廳，但入面食嘅嘢一啲都唔係粥粉麵飯咁簡單，一入夜，呢度就變成小炒天堂。坐低未叫菜就經已聽到廚房入面鑊氣聲，當中由最常吃到的京葱牛柳絲，以至獨門自創的南乳碎香雞都由大廚富哥一手創製，佢話餐牌經常轉換，就咁抬頭望經已有廿幾三十款畀你揀，而且保證即叫即炒，熱辣辣送上枱。
蒸魚套餐最抵食
榮豐除了24小時營業之外，仲係年中無休，當中最抵食的莫過於蒸魚套餐，有魚、有湯連油菜和白飯都只不過係$33，仲有至少5、6款魚畀你揀，全部均新鮮入貨，不留隔夜。
XO醬炒白鱔球
白鱔經起骨後才取肉炒球，再加入自家製的XO醬，非常惹味，是店內受歡迎菜式之一。
南乳碎香雞
經南乳醃過的雞沾上薄薄的粉漿輕炸，火候控制剛剛好，皮薄香脆，雞亦唔太乾身，用來佐酒一流。
京葱牛柳絲
小炒均以靚料炮製，牛柳經爆香後，入口嫩滑。
榮豐粥麵茶餐廳（27628827）
地址：土瓜灣譚公道59號地下
