賓架L呢個禮拜出入殯儀館，甚為傷感。三月三十一日星期五上午十點半先去香港殯儀館拜祭馬章馥仙女士（已故馬錦明博士夫人，大生銀行馬清煜之母），馬家、章家都係大家族，親屬繁衍，真係多到數唔晒，賓架L太太嘅家姐，嫁與一位馬先生，故此一定要去靈堂一拜。
去完香港殯儀館就趕去紅磡世界殯儀館，參加下午一時半嘅譚江柏先生之喪禮，譚江柏係譚詠麟之父，大家唔識譚江柏嘅足球威水史，都一定識譚校長嘅名曲，賓架L與譚家有淵源，唔去靈堂唔得。左丁山先父在生之時，成日講中國一九三六年參加柏林奧運嘅足球隊點樣巴閉，有鋼門包家平，銅頭譚江柏，小鋼炮孫錦順，球王李惠堂，講到呢隊中國隊係一百年來最強，以香港人及上海人為主。譚江柏可能係呢隊波最後辭世嘅一位隊員。一九三六年嘅中國足球隊聽講話叻過一九五八年東京亞運足球金牌得主中華民國隊（全係香港球員），如果要拗，相信唔會有結果，問阿叔林尚義都未必知。
聽日四月六日，賓架L要去佢「半個師傅」紀有年先生嘅喪禮（香港殯儀館，上午十點半），賓架L自香港大學畢業後，唔做政府工，加入恒生銀行，當年常留披頭四式長頭髮，經理紀有年日日叫佢去飛髮，每次見到賓架L未剪髮，就畀佢一蚊：「畀錢你飛髮。」賓架L後來離開恒生，成為外資銀行個人財務部門及財務公司主管，每星期五到陸羽飲茶，都會見到紀老先生（積閏享壽九十有二歲）與兩至四個恒生女職員一齊飲茶，數十年不變，恒生總行大堂女職員相信冇人唔識得紀伯。如果冇記錯，三月十七日星期五紀伯仍然喺陸羽畀錢賓架L（一蚊），點知佢喺三月二十一日下午四時二十分去世，事先好難估得到。恒生銀行元老又少咗一個，賓架L想起以後上陸羽，再冇人畀一蚊佢飛髮，未免有傷感。