愚人節當日，好多人都俾人玩，就連長實主席李嘉誠都唔例外。近日有中學生網友向八方報料，話佢哋玩MSN時有一段假新聞好熱烈流傳緊，就係話長實主席李嘉誠喺愚人節當日逝世，享年七十三歲；又話香港股票要停市一日，希望市民接受呢個消息云云，嗰段新聞仲話李生死咗後，決定將長實「主任」之位傳畀李澤鉅。
八方好奇問吓長實發言人，李生被玩，佢會唔會追究？發言人就話，都過咗咁耐，唔會追究，仲笑言噚日先同李生開完會，佢仲好健康，無啦啦俾人傳啲咁嘅嘢，都真係好無聊！
而香港電腦教育學會主席伍學齡仲話，整呢啲假網頁同新聞好容易，識電腦嘅人只需要十分鐘就搞掂，不過俾人發現就屬刑事，都咪話唔大件事呀！
唔知網站公司係咪擔心傳吓傳吓，市民會信以為真，八方噚日五點通知佢哋，網站七點就將呢個網頁刪除咗，所以大家想睇都冇辦法喇。
傳真︰2623-9278
電郵︰[email protected]