代理行老細諗好多計仔去推動前線促成交易，目的自然係想增加公司收入，除咗獎金呢一招撒手鐧，請食飯都係最實際同受歡迎嘅招數。屋之島就比較鍾意用雞髀打人呢招。
上個月屋之島豪宅部嘅生意額創咗3年新高，既然搵到錢，董事總經理歐志康都好識做，請晒成個豪宅部10個同事去天香樓擦番餐，兼卡拉OK直落。唔好以為天香樓好似好殘舊咁款，入去食碗麵閒閒哋要200幾蚊至落得樓，所以嗰晚找數每位要成2000蚊，但點都平過早前請去澳門法國餐廳食嗰餐。
雖然歐志康唔肯講豪宅部做到幾多數，但從以下例子可知一二──淺水灣麗景道7號壁池洋房，成交價4230萬；中半山帝景園4座中層A室，造價2120萬，大家大可自行計數。