煲呔近日好有閒情逸致，都未連任，已經諗緊退休後去邊度住。噚日又喺免費報紙風花雪月，寫文大講電影《星球大戰》、《007占士邦》同星爺嘅《功夫》，煲呔仲爆佢老婆嘅甜心唔係自己，而係畢彼特，鍾意佢靚仔有型啩，但係煲呔就鍾意湯漢斯，因為佢演技得（其實煲呔自己都好好戲啫，唔信，你睇完下文就會信）！咁多人吼住煲呔個特首位，但佢咁得閒安排退休、坐喺屋企度印印腳大講戲經，擺明唔將其他對手放喺眼內，贏梗咁款，唔怪得土共咁谷氣，係都要玩佢個添馬艦。
煲呔話佢好鍾意睇戲，但做咗政務司司長後就好少入戲院，做埋特首就更加唔使講，因為去親戲院都要三人行，同個保鑣一齊睇，咁麻煩，不如返屋企同老婆煲碟好過。佢話最近入戲院睇過嘅兩套戲，已經係上年嘅《功夫》同前年嘅《機場客運站》。
煲呔鍾意講電影，佢做財爺時曾經叫市民學《光豬六壯士》一樣全力以赴，又曾經喺《本能》度偷橋，比喻自己嘅預算案好似除晒衫嘅莎朗史東咁高透明度。既然煲呔話自己講到戲癮大起，八方建議佢不如同老婆睇番場《本能2》，話唔定可以偷到師有助連任。
一套大陸戲都唔提吓
除咗三級片外，煲呔都鍾意睇占士邦，佢話一聽到首主題音樂就精神為之一振，仲勾起好多回憶，好似當年帶個仔去睇《星球大戰》，個仔睇完黑武士好驚，成半年唔敢入戲院，唔經唔覺星戰已經拍到第六集，阿仔已經成家立室，梗係乜都唔驚啦。煲呔又好念舊，話唔捨得七、八十年代戲院門口啲小販，又賣粟米、鹽焗雞髀、鵪鶉蛋、炭爐燒魷魚同雞蛋仔，真係好鬼死香，香港呢種民間風味𠵱家已經一去不復返，就算有戲院有得賣魷魚，味道都唔同晒啦！
但睇咁多戲，佢竟然一套大陸戲都唔提吓，真係唔掂，話晒大陸戲近年喺國際影展都贏唔少獎，身為前殖民地官員，就算唔睇咩《開國大典》、《三大戰役》，至少都要睇吓謝晉嘅《鴉片戰爭》，睇吓內地官方嘅論述，當國情教育嚟睇都好應該。
曾太讚畢仔做得好，係要拉佢去睇《木馬屠城記》，其實畢仔近期最出名嘅戲都係同安祖蓮娜合演嘅《Mr.&Mrs.Smith》。唔知曾太係咪暗示，佢同曾生其實好似套戲咁，表面好似好和好，但暗地裏就晚晚喺禮賓府片到七彩？
傳真︰2623-9278
電郵︰[email protected]