雖則個市好景，搵人捐錢易好多，之不過要人家捐得心甘命抵，都要時不時搞搞新噱頭，就連老字號如公益金都唔例外！好似噚日為今年第一個籌款活動「公益金尋寶挑戰賽」做宣傳咁，就大打「公子牌」，搵咗活動贊助人新濠何猷龍，同埋佢班老死：東亞李民斌、合和胡文新及信和黃永光到場造勢，嘩！四個富豪第二代同場，淨係爭位影相都亂過乜啦！
叫得做公子，除咗大家都有個富豪伯爺之外，出場嘅排場就個個唔同，最遲出場嘅小賭王，例牌有兩個保鑣傍住，最早現身嘅胡文新都有集團執董嚴文俊撐住，李民斌及黃永光兩個就單身赴會，但李公子就趁人多快步閃入貴賓房，果真有乃父寶Baby嘅風範，而27歲嘅黃永光雖則低調入場，但佢個樣同老竇黃志祥成個餅印，想唔認得都好難。
四位公子喺公司同屋企就係山寨王，但喺公益金執委主席柯清輝、籌委孫大倫面前，佢地就變晒小朋友，恭恭敬敬咁聽訓示，兩個「大人」吩咐一眾「小朋友」今年要完成公益金畀佢哋嘅任務，其中最好笑係叫何猷龍搵屋企嘅親友去行百萬行，仲要行晒全程，嘩，何氏咁多房口，嚟晒都好墟冚，唔知佢搵唔搵埋賭王一齊行呢？
會後孫大倫向華華爆料，話個任務唔係「度身訂做」，係之前抽籤決定嘅，一眾公子都冇乜意見。至於今次出動「公子」籌款，佢就笑笑口話估計善款會比預期多，梗係！公子有面又有錢，出錢出力捧下自己都要啦！
李華華
讀者如有任何意見或報料，歡迎發送電郵至[email protected]。
