我最鍾意食番茄，但只限煮熟後嘅番茄，「生番」絕對唔會食。而我最拿手就係煲羅宋湯，不過會見到番茄夠紅夠大先會煲，如果番茄青青綠綠就要加大量茄膏或茄汁先得。番茄、薯仔、洋葱都係必需材料，我唔會用普通牛肉，我會落「金錢𦟌」煲，因為金錢𦟌筋肉勻稱，一啲都唔韌，煲完湯夾出嚟可以當一味餸嚟食。不過記得唔可以煲湯煲咁耐，如果唔係就唔夠腍。
