東芝部HDDVD機終於面世，標示住影碟世界正式進入高清年代。目前呢部XA1賣成七千幾蚊港紙，仲要未有碟出，只得跟機2套HD影碟睇住先，電腦男意見係除非身家雄厚冇碇使，否則毋須急住訂貨，等埋四月尾更多HDDVD影片推出，甚至五月Blu-rayPlayer加入埋戰場先買都未遲。
好多人都唔多明兩大新世代高清制式有乜分別，今日就先講講以東芝陣營為首嘅HDDVD制式；一字記之曰「平」！不久嘅將來，HDDVD播放機標準售價只約四千蚊，而具燒錄功能及電腦用嘅HDDVD燒錄器亦只約二千多元，至於影碟則約$150，而燒錄性質嘅「白板碟」亦只約三數十蚊，以新科技嚟計，的確係好抵玩！另一優勝之處，係其讀頭周波數比Blu-ray長，較為適合流動裝置使用，如汽車、手提電腦等。咁多好處，電腦男卻鍾情SONY陣營嘅Blu-ray制式，點解？聽日講你知！
4月4日 心情：期待