好一劑香港國際七人欖球賽，令銅鑼灣及灣仔酒店入住率高達9成，多謝呢班來港觀戰嘅老外為香港帶嚟經濟收益。其實要多謝嘅又點少得一班3日企足全場、着綠Tee白短裙腰圍幾Jar啤酒嘅喜力啤妹呢？其中一位啤妹May話：「多得呢班由朝飲到晚都面不改容嘅鬼佬。」梗係喇，佢哋日薪最勁可高達$4,000，做3日就有過萬，咁好搵邊度搵呀？出年可唔可以受埋我玩？
記者：黃藹瑩
攝影：陳陶鈞
最賺錢位南看台
一入大球場即見身穿綠Tee短裙、頭戴綠色閃令令假髮嘅啤酒妹，腰前一個木盤裝住幾Jar啤酒，手執啤酒杯狂叫：「Heineken～」夠晒專業！全場只獨家供應喜力一隻牌子啤酒，點解啤妹們Sell得咁落力？企喺南看台嘅啤酒妹May話：「全場得我哋幾十個Vendor，企到好位最勁可以日賺幾千蚊，唔落力就笨……」原來同一個大球場，唔同地段嘅啤酒銷售量可以差好遠，SouthStand（南看台）就正正係人所共知嘅賺錢位，因為呢個地段最多扮鬼扮馬嘅鬼佬，坐得南看台都係玩得捨得飲一族，一入場就開始飲定啤酒培養情緒，愛隊出場比賽時就更加激動，甚至癲到會玩互潑啤酒、成Jar互隊，「……所以喺南看台Sell酒雖無底薪，賣一Jar啤酒又只袋$10佣金，但閒閒哋賣到400Jar，400Jar即係賺$4,000，3日埋單袋萬二，做3日分分鐘多過人哋一個月人工，絕對值得。」其他地段無錯有$35老底時薪，但平均佣金只得$1,000至$2,000，差好遠！
啤妹：好過落吧酒Sell酒！
一眾啤妹行嚟行去賣啤酒，好似完全唔使休息咁，真係咁捱得？May話：「其實好辛苦㗎，公司有畀休息時間仲包每人1個飯盒，不過一休息分分鐘少百幾二百，畀着你都唔唞啦，真係好肚餓先求其食兩啖囉。」另一啤妹阿怡話：「做Event好過落吧做PromotionGirl，鬼佬係熱情啲會搭吓膊頭攬吓腰，不過自己小心啲就無事喇。」被派往東西看台的啤酒妹阿C就更加落力，一次過攞三四Jar啤酒落看台兜售：「啤酒凍咗就唔好飲，啲客一定唔要，賣唔出就蝕自己錢，所以最緊要眼利，一見鬼佬放喺地嘅啤酒飲到八八九九就要立即過去Sell，鬼佬好飲得多數會再同你買。」
賣酒有風險
辛苦錢人人爭住搵，負責睇場分配啤酒妹工作嘅經理阿Lui話：「喜力已經第六年做大會指定啤酒商，每年都有好多人Apply做Vendor，好多Vendor都已經連續做咗幾年，新人都會請，有好多大學生做Part-time。我哋無特別入職條件，夠18歲個樣OK就得，活潑開朗嘅性格都好重要。」講到咁好搵，其實都要承受風險㗎，因為啤妹們要先科$160買1Jar啤酒，每Jar啤酒賣$170，從中賺$10，好在佣金即袋唔使等，愈賣得多荷包愈腫脹，但係啤酒凍咗賣唔出，就要自己硬食嘞。
球迷夠激造型
雖然今年欖球賽去到最尾嗰日先有個中坑玩裸跑，不過其他球迷嘅「戰衣」一樣有睇頭㗎！
