在跑馬地做蠔做到出晒名的OysterExpress剛進駐銅鑼灣開第三間分店，不過今次的主角不再是生蠔，而是打橫行的蟹，仲專登改名叫「蟹之專門店」。賣的蟹當然有番咁上下，單是餐紙上經已有12種蟹畀你揀，仲有16款煮法任君選擇，要食得刁鑽啲，更可預早訂隻千元極品靚蟹，各位蟹癡，係時候出動啦！
記者：曾靜茵 攝影：陳盛臣 Model：Carrie
坐落於耀華街的「蟹之專門店」，旺中帶靜，而裝修比以往兩間分店更為講究，當你遠處望過去就經已被牆上的超巨型蟹圖案所吸引。甫進店內，更發現特意用上橙色的枱燈砌成一幅長腳蟹的形狀，甚花心思。
食勻全世界蟹
話明係蟹之專門店，當然有來自不同地方的蟹以供選擇，單是餐紙上經已有12款之多，除了常吃的本地膏蟹及花蟹外，還有法國膏蟹、波士頓肉蟹、日本毛蟹、泰國軟殼蟹、澳洲皇帝蟹等。另越南肉蟹、菲律賓藍蟹，甚至全身白色較為罕有的水晶蟹也可吃到，不過必須在一星期前預定，而價錢亦要$488/磅，吃一隻差不多要成千元，可謂蟹中極品。
中日韓新煮法
老闆娘Winnie亦是愛蟹之人，由買貨以至廚房工作亦一手包辦，加上她亦喜愛鑽研新的烹調技巧，創出不少新的食法，例如用啤酒煮、加入日本麵豉湯、用韓國泡菜來炒以及用橙酒來煮等；當然唔少得清蒸、炒薑葱、炸、鹽燒等煮法，共有16種之多！若你是蟹的門外漢亦不要緊，店員會為你講解，讓你可在短短的用餐時間內成為食蟹專家。
一蟹多吃不另收費
收費方面，則以蟹的重量來計算，客人最少要惠顧一隻，而烹調是不需另加收費，還可以一蟹多吃，所以最好連同一班好友來品嚐，那就可以試多幾款不同種類的蟹，還可以點選其他海鮮，痛快地豪吃一頓。
花蟹麵豉湯
一般花蟹都用來凍食，但其鮮甜的蟹肉與麵豉湯份外配合，除了為蟹肉添加了一份獨特的香味外，還為麵豉湯帶來了鮮甜味。
鹽焗阿拉斯加長腳蟹
外國人都愛凍食長腳蟹，但Winnie則認為用鹽焗較好，因為鹽焗的過程中可抽乾水份，令長腳蟹更鮮甜味美，咬落仲啖啖肉。
啤酒煮波士頓肉蟹
波士頓肉蟹本身殼薄肉厚，只要用洋葱爆香後加入啤酒再煮，讓啤酒滲入蟹肉中，更能帶出蟹肉的鮮味。
軟殼蟹奄列
軟殼蟹一般都是油炸的，但Winnie則覺得太油膩，故改以奄列方式來煮，香滑的蛋配以脆口的蟹身，食落特別滋味。
咖喱炒青口
除了蟹之外，店內還有蠔及其他海鮮供應，呢味咖喱炒青口是創新的菜式，未上枱時經已在遠處傳來陣陣的咖喱香。
清蒸法國膏蟹
法國膏蟹肉少膏多，最適宜用來清蒸，讓甘香軟滑的蟹膏能保持原汁原味，看到滿滿的蟹膏擠於蟹蓋之中，未吃經已讓人垂涎三尺。
膏蟹粥
本地膏蟹的蟹膏較硬身，用來煲粥或煲湯，讓蟹膏溶化於其中，吃每一口亦品嚐到甘香的味道。
跑馬地常客
法國膏蟹
法國膏蟹可以話係膏蟹之王，由於佢天生懶惰，除咗搵嘢食之外，幾乎都唔會郁動，所以蟹膏特別多，而且入口既甘香又軟滑。
產地：法國
波士頓肉蟹
有東岸蟹王美譽的波士頓肉蟹，可以話係重量級size，單係蟹蓋經已有5、6吋闊，加上殼薄肉厚，食落非常鮮甜。
產地：美國
軟殼蟹
軟殼蟹細細隻，無論蟹蓋或手手腳腳都軟腍腍，通常連殼食，所以含豐富的鈣質，若是炸香來吃，簡直是佐酒的極品。
產地：泰國
本地膏蟹
本地膏蟹以墨綠色為主，一煮熟就變成橙色，其特點在於其橙紅色的蟹膏，一般以傳統薑葱來炒特別甘香，不過蟹膏較實及硬身。
產地：本地
本地花蟹
本地花蟹的蟹殼呈紅黑色，色澤艷麗，其特點在於殼薄肉厚，肉質嫩滑鮮甜，凍食或熱食皆宜。
產地：本地
泥蟹
澳洲泥蟹棲息於鹽度較低的泥濘沼澤地帶，最大特點是擁有一對粗壯的蟹箝，而且身形較大，肉質特別豐厚又味道鮮甜。
產地：澳洲
OysterExpress蟹之專門店
地址：銅鑼灣耀華街25號丹納中心1號店
電話：25750227
營業時間：4:00pm-2:00am
座位：約30個
收費：現金及信用卡，設加一