內地巨頭電信公司派完成績表，又到論功行賞。中電信05年嘅年報披露，董事長王曉初（圖）舊年人工只得39.8萬元人民幣，比同行中移動、網通嘅老總少一大截，公司啲執行董事人工都高過佢。點解？因為佢04年底先過檔，點同人家做足成年比。
至於中移動同網通，年內股價上漲，加上公司派發認股權證畀董事，計埋落去人工梗多好多。好似中移動阿頭王建宙咁，人工包埋市值426.4萬元認股權證，舊年收入就有成六百幾萬；網通張春江舊年人工有二百萬，原來佢04年攞嘅92萬股認股權證今年5月中先可行使，所以冇計入。以噚日網通收市價13.85元計算，市值成1274.2萬元，仲勁過王建宙。
唔係你財唔入你袋，王曉初入咗中移動之後，公司股價見過60蚊，之後一路喺廿幾蚊徘徊，佢一走，股價就有起色。最慘中電信係H股，唔可以發認股權證；佢惟有努力工作攞多啲獎金。