前幾日提過TOM在線少當家王雷雷「寸」哎吔契媽周凱旋單嘢，結果冇晒下文！其實，淨係睇周小姐出幾錢糧畀雷雷，就知佢兩個一定唔會反面，噚日TOM在線本年報出咗，CEO雷雷喺05年收咗276.1萬美金，即係成2100多萬港銀，仲未計啲咩option呀咁，比04年嘅20.7萬美金人工，足足加咗12倍。
加得咁勁，根據公關哥哥解話，其實雷雷05年份糧裏面有百萬美金係屬於04年嘅，因為薪酬委員會批遲咗，所以咪今年先畀番雷雷，即係話雷雷04同05年嘅人工應該係120.7萬同埋176.1萬美金至真……但就算咁計，雷雷份糧都加咗55.4萬美金（成4百幾萬港），你話，周小姐係咪好錫佢、TOM仔又點算係窮人呢？