清明時節搵古講，又係時候update吓大家《信報》賣盤單嘢。正如八方先排講過，當李家二少澤楷一日仲未肯定係咪同阿信有緣份，條街定會風繼續吹！
最新版本係話二少同林氏伉儷都係唔啱嘴形，單刁經已wor咗，二少亦隨即派人去傾第二啲報紙，當中包括張拿督嗰份自稱公信力第一嘅《明報》。仲有就係，中南海班阿爺同埋佢哋條靚煲呔昅到實，睇住二少能否同阿信終成眷屬。
咁呢陣風有幾堅？報壇權威人士話二少買明仔可能性近乎零！皆因二少阿爹個好朋友旋旋，先嗰排經已又快二少一步，攞咗近3%明仔股份，咁以二少一向作風，好話唔好聽，旋旋掂咗嘅，佢一定會搵食行遠啲……bytheway，呢個講法經已響鰂魚涌同中環中心流傳咗幾年！
另一幫權威人士話二少同阿信段緣未了得晒，呢排林氏兩老成日話放假，而二少又唔急，兩老一嫩處於冷靜與熱情之間，至於話阿爺昅實，有幾奇呢又？話晒阿信都有啲江湖地位，賣就賣硬，日後落入邊個手上可能會對官府有唔同影響……咪話八方話，煲呔仲急過二少都有之！
至於兩老一嫩點解依然膠着，都係嗰句，賣仔嗰位仲係摸住阿仔個頭，又話要睇多十八個月，買個位亦非等閒之輩，唔多甘心畀完錢仲無得話事……咁又係，二少肯掟咁大嚿錢，梗係要晒靈魂同肉體啦，唔係買嚟做乜？
傳真︰2623-9278
電郵︰[email protected]