處男下海，首次站在台上以普通話演出。
鳳凰衞星十周年生日，在機場展覽中心搞盛大晚會，場館夠晒大，除了搞展覽之外，將來定必是搞Show及搞Party的好地方，不過就真係夠晒隔涉，搭機鐵去到機場都仲要轉車，如果唔係有排行。
電視台生日，竟然可以請到兩代特首做主禮嘉賓，曾特首雖然仍然笑容滿面，但睇得出其實攰到黐筋，反而董伯伯精神唔錯，完成啟動儀式落台時唔小心踏錯腳險些跌倒，董伯伯立即左腳換右腳然後快步衝前幾步卸去跌勢，再抬頭笑笑口表示冇事，見到董伯伯身體好，我都戥佢開心。當晚為演藝人協會與張達明及曾志偉搭檔演出一段類似棟篤笑節目，開場時見到現場觀眾的年齡比較成熟，個樣又唔係話太想笑，坐在最前排的全部係大人物，唔係高官就係大有錢佬，個樣更加唧都唔笑，做棟篤笑遇到呢類觀眾都幾愁，硬着頭皮踏上台，用普通話先跟達明互相嘲笑一番，咦？唔單止聽得懂我們的普通話，反應還不錯，除了有笑聲，也有掌聲。既然有反應，一切便好辦，總括來說當晚的演出及觀眾反應均不俗，一些絆嘴的名詞如：「魯豫有約」、「李敖有話說」，因為訓練有素，講得頭頭是道，反而是那些看似簡單的「小人物」及「有血吐」，吐了半天吐不出來，自己站在台上都偷笑。不時望向觀眾席，只見董伯伯也有被我們的笑話逗得大樂，笑得像個小孩，旁邊的曾憲梓先生則繼續黑口黑面，唧都唔笑，正常吖！