孫柏文今日想幫大家分析386中石化。特別係「成品油改革」同埋「上游暴利稅」，對於中石化有幾好。中石化全年賺$0.46一股，噚日收市價$4.65，即係市盈率為10。
我曾幾何時喺股票行做過分析員，工作主要職責係用隻金手指幫啲客篤啲好股去買，同埋篤啲唔好嘅股票去賣。我記得當年做得好辛苦，特別係啱啱入行嘅時候去啲上市公司分析員發報會，完全唔知道其他分析員問緊乜，更加唔知道公司管理層嘅答案點解。你哋作為金手指fan屎，一定會問：「孫柏文同大家一樣，身軀流嘅係嗰種香港人獨有、充滿「投機炒賣DNA」嘅血。仲要由細細個開始，已經炒吓龍珠卡，同埋周慧敏、朱茵嘅Yes!卡。區區上市公司，分析又有幾咁難？」
冇錯，如果當年股票行老闆叫我睇嘅行業，係一啲香港人由細到大耳熟能詳嘅行業，例如地產、銀行、工業呢類型股票，做分析員可能會容易啲。可惜，當年我入行嘅時候，來自新加坡嘅老闆叫咗我去睇中國石油業嘅股票。當年，我一聽到呢個order，爭啲暈低。口快快咁答咗一句：「石油，唔係嘛？老闆，我哋香港人連打油都唔識，去油站都係人哋幫我哋打。仲有，中國石油業嘅公司，個個郁親都成千億生意，我啱啱入行，可唔可以睇番啲一年幾千萬生意嘅電子零件公司呀？」當時，話一出口，我都已經知道「ooops舐嘢」，不過好彩，當時老闆忽然患咗間歇性失聰，只係用啲我覺得好奇怪嘅眼光望住我，同埋問咗我一句：「咩話？」我就係咁樣開始石油分析員工作。所以，大家千祈唔好以為做分析員一定好容易。
有如「利潤保證」
雖然，我已經唔係石油分析員，而變成一個花名「白銀文」嘅財經口水佬，不過，隻金手指今日一定要同大家講中石化點解咁好。
先講「上游暴利稅」對中石化嘅影響，如果05年已經有「上游暴利稅」，中石化就會每股賺少3.5仙。如果一如孫柏文所料，今年油價平均68美元一桶石油，咁中石化實現油價，應該比05年升26%去到55美元一桶。就算中石化原油生產冇增加，仲要有「上游暴利稅」，每股可以賺多5.3仙。
咁「成品油改革」，新計法就係用煉油成本乘一個「合理毛利」率。同香港啲電力公司一樣有「利潤保證」。就算「合理毛利」率係花旗國短息嘅4.75%，如果05年由4月至到12月有「成品油改革」，中石化會每股煉油賺23仙，而唔係好似𠵱家每股蝕4仙。如果今年煉油都係賺23仙，而上游多賺5.3仙，中石化會每股賺79仙，又如果中石化市盈率維持喺10呢個水平，咁股價就係$7.9。中石化噚日收市價$4.65，咁你明白我𠵱家點解唔係分析員啦！
孫柏文