馮仁昭四圍超：
粟山千明淪落街頭開記招嬲爆走人

日本女藝人粟山千明喺《標殺令》（KillBill）裏面扮過制服女殺手，而為港人熟悉，佢嘅新戲《天堂失格》仲係香港國際電影節參展電影之一，噚日同新加坡電影《小孩不笨2》分別喺文化中心戶外空地舉行記者會。

布景乜都冇

話晒都係外國明星訪港，馮仁昭都有去湊下熱鬧，《小孩不笨2》個記者會，只係見到記者喺度採訪，唔多覺有市民圍觀噃，間中有啲遊客行過都係望兩望就走。個布景又慳皮，得幾個欄杆圍住，連電影海報都冇張，主持都要電影節總監戚家基做埋，《小》片嘅導演梁志強就冇所謂，仲談笑風生話偶像係周星馳，成日睇佢嘅戲偷橋。
跟住開記招嘅《天堂失格》都唔好得幾多，數埋得十零個市民圍觀，粟山千明都算畀足面，着住件DeepV黃色裙到場。佢就好彩有幾個同鄉撐場影下相，不過大會得個繙譯傍住佢，搞到粟山千明唔知坐定企好。粟山千明雖然賣口乖話香港電影好好睇，仲話睇得最多係成龍，不過可能始終都係唔太滿意大會嘅安排，粟山千明本來講好會接受傳媒訪問，最後都取消唔做就走人。