賭王何鴻燊與胞妹十姑娘何婉琪因財失義，已決裂五年，其間還不時透過傳媒隔空互罵。前晚賭王陪三姨太陳婉珍出席東華晚宴時，對多年不見的胞妹流露記掛之情，指她音信全無，五年來未曾拜祖先，大呼陰功及可惜。
何鴻燊的三姨太陳婉珍榮升東華三院總理，他前日朝晚為愛妻撐場，除了早上出席就職禮外，前晚七時多，賭王又前往灣仔君悅酒店出席東華餐舞會。坐慣主家席的何鴻燊，陪三姨太坐靠邊的三十一號枱，不時大讚三太身材好，說：「佢keep得好fit㗎，我都睇得多囉。」又大讚對方識煮廣東菜，尤其擅長煮雞和魚。賭王透露復活節將會歐遊，三太陳婉珍則解釋是帶長女何超雲到英國，接受升學的面試。
唔敢露面
「我都戥佢辛苦」
賭王耐心坐足全晚，中途更走出場外與記者閒聊。提到早前澳娛準備上市，十姑娘擬入稟阻止，賭王初時頗勞氣，他說：「呢個係癲嘅，冇得醫。我上巿都係幫佢搵錢，佢唔鍾意，唔通佢同錢有仇？佢年年都唔開心，我見到報道唔係佢講，𠵱家身體差好多，又唔敢露面。」提及十姑娘二月時入稟告他誹謗，賭王說：「呢個世界係法治社會，我未驚過。」
賭王與胞妹十姑娘四年多前因過億元債款而不和，其後兄妹反目，○三年十姑娘多次發聲明大爆澳娛內幕，向賭王追債、追澳娛達三百億的盈利分紅，其後又控告賭王誹謗。十姑娘近年無公開露面，只有其子何東舜銘及媳婦陳復生間中代其出面打點。問到賭王可覺有人不讓十姑娘外出？賭王默不作聲，再提到十姑娘往日風光，近年則低調絕迹，可覺其妹身體欠佳？何鴻燊輕歎一聲說：「唉，我都戥佢辛苦，又出唔到嚟，打電話畀佢、寫信畀佢都全部冇回音。個祖先位擺我屋企淺水灣一號，五年嚟佢都冇嚟拜過，真係可惜。」今日乃清明節，難怪賭王有此興歎。他接着說：「其他妹都一樣搵佢唔到，澳門間屋又丟空咗。」
恨意難消
唔識何東舜銘
記者提議賭王聯絡十姑娘兒子何東舜銘，他說：「呢個我唔知乜嚟㗎，我家人姓何，祖先係何世禮將軍，𠵱家得兩個人姓何東（Hotung），一個係EricHotung（何鴻章）。祖先講到明唔畀姓Hotung嘅返嚟。」何鴻燊不知有心定無意，將何東舜銘的名字倒轉講，他說：「我都唔知乜嘢何東銘舜，定麥銘舜。」問何鴻燊現時可有記掛胞妹，他一臉黯然說：「咁陰功，我以前同佢最好，唔係都唔會擺到佢咁高位啦，佢唔珍惜，仲想落標攞我個牌。」而早前又有消息指十姑娘何婉琪將於今個月公開露面，遠赴北京出席活動。
不提老父
猷龍專注善事
此外，何鴻燊兒子何猷龍昨日在中環，出席「公益金尋寶挑戰賽」的記者會，活動將於本月二十九日在澳門漁人碼頭舉行初賽。身為是次活動籌劃委員的何猷龍主持儀式後，被記者問及其父會捐多少錢，但他默不多聲，匆匆乘𨋢離去。而同場出現的胡文新則說：「做善事愈多愈好啦，我自己都會捐錢，身體力行，重會同其他人相議多啲特別辦法。」
採訪：梁錦雯、卓寶花
攝影：陳志嵐
