朋友Jeffery生性慳儉，任何事情也希望以最小的付出，換取最大回報。最近，買車代步這個課題令他大感懊惱，我介紹了起亞Cerato給他，點解？唔使12萬就可以買到一部齊料2.0公升車喎！不過他卻懷疑我所說的一切，Jeffery，睇吓我呢個介紹你就知「流定堅」！
記者：鄭達基 攝影：譚盈傑
模特兒：Ruby（Salvador）
「車壇上的2.0公升車種，只有起亞Cerato是12萬元以下，而且質素一啲都唔差。」
「…Cerato用福特地球汽車的概念，以便宜和實用為賣點，希望周圍都見到佢…」
「我認為車廂配搭跟售價一樣，來得實而不華，前排絲絨椅承托力算不錯，但略嫌過彎時會令我跣來跣去。」
新近抵港的起亞Cerato有四門和五門揭背兩個Version，兩者望落都好Smart，至於我愛哪一個Version？當然是五門揭背版，原因好簡單，夠Sporty囉！它擁有一個流線型的車體，低斜車頭設計加上一個活像歐洲某汽車品牌出品的鬼面罩Design，車尾還有一對就算離你九丈遠，也可清楚看見你存在的尾燈組合，襯埋尾翼和16吋合金胎軨，咁你話佢個Look唔係SellSporty係Sell咩喇。不過，在外形設計上它也有實用的一面，因為尾門可作大幅度的開啟，加上低重心設計，就算是女士們要提存尾箱的行李也會大叫SoEasy！
「我愛五門揭背Version，原因好簡單，Cerato本身唔係太型仔，四門老餅，但五門夠Sporty！」
打開車門，最先跟我打招呼的是前後兩排絲絨座椅，還說不要客氣隨便坐，我想也不想便坐上駕駛席，接着又走到後排試坐一下，事後發覺最好坐的是前排，全因承托力較高，後座則略嫌差些少，幸好有中央手枕和杯座等配備搭夠；還有一樣稍令我不滿的事情，就是可能為了遷就車價，而沒有了真皮座椅這項配備，愛實用的User當然拍手叫好，但講究享受的用家則肯定不能接受，所以若可加入埋真皮座椅而車價沒有太大改動的話，我相信大家（尤其是我朋友Jeffery）也可接受得到。
另外，Cerato的設備也齊全得很，甚麼高級音響、原廠冷氣、電天窗、門邊電鏡等所有設備都有齊，用落也叫容易。此外，最吸引我的地方還是那個大得嚇人的尾箱，試車當天我們試過將協助拍攝的梯子放進去也不成問題，而且還有空間擺放其他物件，後排椅背又可以獨立收摺，擺放較長物品或在車廂提存行李也很容易，抵讚！
「…設備好齊，但質素一般，欠真皮座椅。車身造工不花巧，走過大爛路，無太多雜聲，加上咁低車價，起亞呢次發圍喇。…」
試車前，我還是對韓國汽車所配用的引擎存有戒心，始終覺得它們聲威較弱，像一位未吃飯便去跑步的小朋友一樣，未到一半已大叫辛苦；但Cerato所用的一台2.0公升引擎卻剛好相反，不論在斜路行車或在高速公路巡航，甚至要突然加速也不成問題，配埋5前速手波組合，難怪試車時位在車頭的引擎會跟我說：「Comeonbaby！踩大油去喇，我得㗎！」車子的走彎表現也不錯，紮實的車架加16吋輪胎，還有電子循迹系統幫手，難怪掟彎時也像在高速公路行走般平穩喇！
「高速公路上，2.0公升有極好的加速力，有跑車Feel，旁邊一部VVT-i的1.5房車，點都追我唔到。我平過你，又快過你，點同我鬥。」
起亞Cerato簡歷
引擎：1975cc直4DOHC
馬力：143ps/6000rpm
扭力：19.0kgm/4500rpm
傳動：5前速手波
售價：$119,988
查詢：起亞汽車（27609933）
出車資料
牌費：$5,877
保險：$9,121（0%NCB）
車價：$119,988
首期：$12,000
利率：5.5（HirePurchase）
月供：$2,745×48期
（數據只供參考）
加速：B表現稱職
轉向：B車架紮實
制動：C反應不錯
噪音：B上佳之作
舒適：C肥佬唔啱心水
耗油：B每公里約$1.4
傳動：A手波版好玩
評分標準：根據記者試車後的感覺給予評分，最好為A，最差為E。