戴思聰最近見鄭嘉穎發展唔錯，就要佢履行番十三年前嘅合約，將總收入百分之十送畀自己，件事爆咗出嚟之後，戴思聰受千夫所指，佢就扮委屈博同情。好似噚日佢又向傳媒發聲明，暗寸鄭嘉穎係受無綫唆擺，佢話：「鑑於無綫和我多年的良好關係，我曾找過無綫有關人員，希望從中和解，但是我得不到答覆。之後，就點燃了一場是非造謠、醜化的硝煙戰爭……」
「這是陰謀陷害」
戴思聰喺聲明裏面又話：「我知道鄭嘉穎單純，他沒有如此高深的城府，眼前的事實，這不是一場官司，更何況我不曾索取甚麼，他不可能忘情之後還要借公報私仇，我和鄭嘉穎何仇之有？這是陰謀，這是陷害，我絕不信是鄭嘉穎所主使慾為，那麼是誰？天知、地知，鄭嘉穎應該都知……借此我鄭重宣布，聲明我不再是經理人。我仍是坐在鋼琴邊教導歌唱的老師。」戴思聰聲明上處處都另有所指，鄭嘉穎𠵱家幫無綫打工，心水清嘅都知佢暗示無綫係幕後黑手！
馮仁昭噚日都打咗畀戴思聰同無綫高層要求回應，戴思聰噚日就喺電話裏面重申，話會將合約嘅嘢交畀佢個女戴蘊慧處理。對於戴思聰份聲明，無綫總經理陳志雲就回應話：「TVB冇特別回應，因為裏面冇指明係TVB，TVB亦冇插手做任何嘢，再講，呢個係戴思聰同鄭嘉穎嘅私人合約問題，我哋都希望佢哋以和為貴。」
