民建聯上嗰禮拜首次「官」式訪問澳門，見到澳門特首鏵哥固然巴閉，更正嘅係嚐盡美食，鮑參翅肚乜都有，包括十六頭吉品鮑魚及鮑魚汁撈麵，甜品則係一大碗官燕。民建聯成員今次入住賭王何鴻燊旗下嘅葡京酒店，外傳此行由四姨太梁安琪「包起」，因此民建聯喺澳門得到超豪待遇云云，不過民建聯唔肯證實，懶神秘。
賭王噚晚出席東華三院新一屆總理就職晚宴，有記者問佢民建聯訪問澳門係咪四姨太「包起」，賭王話唔知道，要了解吓先知。立法會規定議員或其配偶接受贊助去香港以外地方訪問，需要喺訪問後十四日內向秘書處登記，並要註明接受咗幾多錢旅費、住宿、膳宿津貼等。如果民建聯係君真嘅話，就應該申報埋呢次訪澳係邊個找數嘞。
爆料熱線：29290000、27860099
報料傳真：26239278
報料電郵：[email protected]