上星期，新世界發展執行董事梁志堅證實咗，因為同政府傾唔掂數，所以由新創建同新鴻基地產合作嘅紅灣半島，未能飛上枝頭變鳳凰，由居屋王變成海景豪宅。噚日新創建主席鄭家純（圖左，右為曾蔭培）出席公司嘅頒獎禮，俾記者行家問到紅灣事件，純官又再忍唔住要炮轟政府。
佢話一直都有同政府好認真咁傾紅灣，但政府對補地價個金額好堅持，純官好感慨咁話：「官字兩個口，邊有得傾，佢hold你幾年，對佢嚟講冇損失，但我哋就唔掂。」不過，諗落新創建都唔夠新地揼心，本來個project係新世界自己玩晒，一半由新創建持有，另一半由惠記揸住，不過04年惠記一過唔該就將揸住嗰一半紅灣讓咗畀新地，嗰時新地以為執到寶，將紅灣由居屋變私樓可以執唔少，點知搞咗成年幾，都係敵唔過「官字兩個口」，睇番轉頭，最叻係惠記。程志遠攝