爆機狂迷：韋基利、神高達新加入動作版《機戰》斬得爽

自《機戰》響十幾年前推出以嚟，將唔同機械人動漫作品Crossover玩，已成為一種潮流，不過好多都做得唔係太滿意。舊年擅長整機械人遊戲嘅FromSoftware，幫Banpresto推出咗集眾多機械人於一身嘅動作射擊《ACE》，今年續篇加入《超時空要塞》、《機動武鬥傳》等幾款新作品，系統更將必殺技、連招強化，令戰鬥更爽快！

文：陳福榮

FromSoftware係製作超Fans向作品《ArmoredCore》系列嘅廠商，咁多年以嚟一直都有捧場客，無他嘅，佢有別樹一格機體設計，再加上相當真實嘅操控方式，令玩家好有真係揸住部機械人喺手嘅感覺。登場機體方面，除咗上集已經有嘅《馬沙之反擊》、《機甲戰記》同《聖戰士》等之外，佢新增咗《超時空要塞》、《0083星塵回憶》、《新機動戰記EndlessWaltz》同《機動武鬥傳》等作品，加啲減啲都叫做唔同晒嘅。而且佢仲特登設計咗一部原創機體，俾玩家喺遊戲一開始嗰陣玩，咪睇佢唔係好靚仔咁款，實際上性能一啲都唔輸蝕，開頭靠佢已經殺到開巷。

■除了機械人形態外，還可變形至飛機作戰。
變形

■專為新作設計之原創機體，各方面性能也很平均。

射擊斬劍再駁招

今集喺製作上強調睇動畫時打到飛天嗰種爽快感，所以玩上手變得更加流暢，絕無半點拖泥帶水，有時仲因為佢Lockon之後斬得太快而搞到有啲亂㖭！基本上每台機體都分為主武器同近距離格鬥兩種，有啲似《高達vs》系列咁，可先以遠程槍炮牽制吓先，再睇準機會衝埋去係咁劈，但唔知點解佢啲炮行得好快又Homing，想睇住嚟避其實無咩可能，都係要不斷左右走死一邊閃住嚟打㗎喇。而每款機械人都有幾款獨特嘅Combo連招，一經使用就會有特別效果咁衝埋去連斬幾嘢，威力亦都唔嘢小，想快手打贏拎高分都係靠呢招咋。

■GP02大戰GP01！嫩嫩的浦木豪又怎是賈圖對手。

■近距離武器不但用途大，更可發動連擊Combo。

■經過劇情發展，所能用的武器會慢慢增加。

原創主角巧遇高達人物

至於另一個變更點，就係佢喺場面演出方面大為強化，不單止大頭Cutin，仲有好多實時運算畫面用嚟交代劇情，連埋配音令玩家更有投入感。佢亦增設咗同場殺敵功能，例如第二版講到GP02出嚟搞搞震，有睇套片嘅都知GP01會出嚟加以阻止，咁當然冇辦法打得贏啦，但嗰陣浦木豪就會變成你短暫時間嘅Partner，只要達成指定條件就可以㩒掣一齊出大招，認真爽爆。過關後電腦會因應你打成點給予評價，從而賺取分數提高稱號，咁先至可以為機體進行強化。

■登場機體來自眾多作品，想儲機都有排儲。

■劇情關係，任你怎樣斬也不會傷害到GP02分毫。

特典DVD訪問名監製

由於《ACE2》係針對較高階嘅機迷，所以送嘅嘢都會有啲深度。喺日本只要事前預訂隻Game，就送一隻收錄動畫監製嘅訪問DVD，包括《0083星塵回憶》嘅今西隆志、《超時空要塞：可有記起愛》嘅河森正治、《蒼之流星力士拿》嘅高橋良輔，及大家最為熟識嘅《高達》之父富野由悠季，佢哋會講吓心愛機械人同《ACE》合作起嚟又有咩感覺。除此以外仲包埋開場CGMovie嘅5.1環迴聲版本、電視廣告同其他宣傳影片等，咁都唔算係聽麻甩佬無字幕齋Talking咁悶嘅。

■在日本《ACE2》的預約特典是這張精美DVD。

■裏面收錄了包括富野由悠季等動畫監製的訪問。

測試評分

上集《ACE》由推出前引頸以待到最尾俾人插到飛起，無他嘅，香港玩家要求唔低，求其出隻立體動作射擊又真係滿足唔到大家嘅，不過硬要將佢拎嚟同《高達vs》系列相提並論就唔多公道。呢集佢有成年時間作出改良，唔單止爽快咗兼襟玩咗，儲嘢要素又唔少，登場機體亦令人幾喜出望外，惟獨大家最興奮嘅《機動武鬥傳》居然只得GodGundam一部機可以用，恍如成盆凍水兜頭淋咁款，搞到有啲嘥料囉。