嶺大噚日舉行獎學金頒獎禮，校長陳坤耀請咗行會成員范鴻齡做主禮嘉賓，兩人互送高帽。范鴻齡透露，自己喺六九年港大經濟系畢業，陳校長係六七年嘅師兄，都有教過佢，不過陳校長教過嘅經濟理論，早已畀番晒對方，但係身教，佢就銘記於心喎。
佢形容陳坤耀為人正直，做消委會主席時打破銀行利息壟斷，「所以當時無乜商界人請佢食飯㗎！」
身兼中信泰富董事總經理嘅范鴻齡，噚日亦以「商業倫理」分享吓自己成功之道，勉勵年輕人做人要正直，賺幾多錢唔緊要，重要係退休嘅時候有好嘅名聲。
陳坤耀就對呢位舊學生有讚冇彈，佢話范鴻齡畢業後三十周年紀念，曾經自掏腰包請晒所有教過佢又唔喺香港嘅老師返嚟，包食宿、使費、機票，住嘅係六星級酒店，認真豪氣呀。後嚟范鴻齡補充，畀錢嘅有十個八個同學，唔係佢一個畀晒嘅。
范鴻齡近日成日曝光，有高人估佢有機會上位，大家真係要拭目以待啦！
爆料熱線：29290000、27860099
報料傳真：26239278
報料電郵：[email protected]