一向是《死神來了》電影系列的擁躉，今集第三集嘅導演仲要姓黃，洋名JamesWong，跟霑叔一樣，更加要捧場。
睇《死神來了》系列，百分百官能刺激，百分百唔使用腦，百分百揸住爆穀汽水等驚，皆因《死神來了》系列的故事完全唔使講道義，亦冇訊息想表達，一條大橋Run幾集，總之諗到幾種新視覺震撼嘅死法就可以開新嘅一集，起承轉合完全一式一樣，殺人方法能夠惹起話題就搞掂。
《死神來了》第一集講嘅係一個年青人突然感應到即將起飛嘅飛機會失事，於是鬼殺咁嘈要落機，幾名唔關事乘客也輾轉落了機，飛機最後果然失事，本來以為大命避過一劫的乘客開心未完卻逐一跟隨座位次序意外喪命，是為死神要你死，避也避不了。第三集的大橋一樣，飛機改為過山車，先嚟一場過山車殺人唔眨眼，倖免於難嘅其他幾個人隨後陸續發生意外，其中以曬太陽燈烤燶人及釘槍噗噗噗釘瓜人最有諗頭，其餘嗰幾款都唔錯，總算冇失禮死人。
不知道大家有沒有收過一些附有嚴重交通意外現場照片嘅電郵，肇事人士嘅肢體被撞到支離破碎，周圍都係，《死神再三來了》便用上了寫實的死亡設計營造視覺震撼，看此片時別問邏輯性問題，例如主角在接連目睹朋友慘死之後，為何講兩句笑之後又可像沒事人一樣返工返學搬廠搬寫字樓，你問導演有冇搞錯，導演反問你有冇搞錯問佢有冇搞錯，求娛樂啫，咪問啦！