Hea：4.1猿人節＜下集＞通宵排隊‧打尖‧口角‧報警

NIGO（長尾智明）今次專誠訪港為新舖主持開幕禮，大家都深明有麝自然香嘅道理，所到之處總好似有SpotLight打住一樣，就連明星都爭相埋堆合照。今次有機會為大帝做專訪，時間緊逼就預咗嘅，只是希望趁今勻罕有嘅機會了解佢多啲啫，不過佢嘅官方語調式回答卻令我有少少失望。最最令我遺憾嘅係，我事後先至想起有個問題好想問：「以你今時今日嘅地位，你鍾唔鍾意人哋稱呼你做NIGO（第二）呢呵？」

記者：許維雅、羅灝汶
攝影：何家亮、楊錦文

BusyWorkShop上星期六終於開幕，其實早喺上星期一已經開始有Fans列陣排隊，有人帶備摺櫈、飯盒，排足一星期就係為咗等4月1日11:00am的開幕。不過喺開幕前一晚，愈來愈多Fans加入排隊行列，至早上9:00am已經有大約400人排隊，高峯期10:00am更加有超過500人排隊，NIGO嘅魔力認真誇張，相比起上次台北開幕，陣容更加巨大。排隊的Fans個個都着住BathingApe嘅衫向猿人朝聖，不過香港人排隊出咗名唔守規矩，特別係一班少年15/16歲嘅年輕人，有人打尖、爆粗、起哄，場面一時間非常混亂，最離譜係留下一大堆垃圾要清潔人員幫手清場。

■每張籌都印有猿人頭，而且Mark晒號碼！

■呢幾位哥仔一收到籌就勁心急想衝入店！

■排喺70名後的肯定買唔到靚貨，因為已經俾攞籌的人士掃清。

■不肯上鏡嘅掃地阿姐：「如果我啲仔女好似佢哋咁，生嚿叉燒好過！」

■第一輪排隊人士話入店後有水貨佬收集購物籌，所以好多人冇買嘢就走！

當日只有持籌人士可以入場，每人限買3件貨品，頭70名人士可以多選購一件0字Tee。有人9:30am開始排，4:30pm先入到場。不過經追問之下先知，香港0字Tee喺頭15分鐘冇晒！長袖衞衣冇晒！MILO地氈都冇埋！
另一邊廂排隊人士多次發生口角，場面非常混亂，更加有人報警投訴「打尖」，搞到為民請命的警務人員亦要到場維持秩序。被傳打尖的是頭50人，有人指出他們來自水貨店。最奇怪的是第一輪持籌人士（每次限放25人入內），有大部份走出來時都是兩手空空，相信已經將「購物籌」轉交水貨人士。BusyWorkShop亦知道有水貨人士在場，竟然向傳媒們要求不要拍水貨人士的樣子，咦？唔通行貨同水貨一早夾好咗？

■樂仔：「我喺3日前已經開始排隊！今日5:15am，突然排頭位嗰個叫咗50個人出嚟打尖，我即時報警，佢哋一定係水貨舖啲人。」

■警務人員叫店員同樂仔出嚟理論，件事好快平息咗，最後樂仔返回原位排隊。

■呢班排頭位的就是樂仔聲稱的水貨人士，警員為咗了解「打尖」事件，亦有向他們詢問情況。

■圖中的排頭位人士，一見鏡頭就立即廻避，點先？究竟係買衫定係做賊先？

■第一輪排隊人士成功買到嘢，阿Dee（左）同馬騮（右），兩人合共買咗四千多元。

■阿Dee：「我排咗好幾日，不過i.t肯定收起好多貨，因為入面啲嘢好少，而且排頭位都係水貨店啲人，一入去已經掃晒啲嘢。」

■原來職員早已經準備好，只有持籌的人士可以入場，每人限買3件貨品。頭70名人士可以多選購一件0字Tee，不過阿Dee話一定冇70件貨，估計有大部份被店員Hold起。

NIGO（Ni）　記者（記）
記：4月1日對於你來講好似係一個好特別嘅日子，跟13年前與UC高橋盾開NOWHERE時嘅心情有甚麼分別？
Ni：我唔係特登揀呢日開幕，只係咁啱得咁蹺。不過，香港BAPESTORE係全世界最大嘅，所以心情都好興奮。這間店舖裝修設計各樣都質素好高，見到有人行、有人睇已經好開心。

記：點解會選擇喺中環開店？係咪想同其他名牌睇齊？
Ni：唔係刻意揀中環開店，亦冇咁嘅意思。我個牌子係StreetLabel，唔可以同其他HighFashion相提並論，我只想別人同樣重視StreetLabel。

記：會唔會再喺香港開分店？對於龐大嘅中國市場有冇興趣？
Ni：暫時都唔會喺香港、中國再開分店，在我來說香港已經代表中國，有香港這一間已經好足夠。整個歐洲來說，我只對倫敦這個地方有興趣，所以唔會喺歐洲其他地方開分店。至於𠵱家就忙於準備LA分店，相信年內會成事。

記：對於APE分店，喺你眼中美國、日本、英國、台灣同香港嘅市場有甚麼分別？
Ni：日本跟亞洲市場很相似，我覺得係美國特別唔同，美國係屬於高級StreetFashion，好Status。

■一貫作風，全新猿人上身，NIGO合作地順應民意企位，識做地擺出不同CoolPose。

記：你自己最鍾意邊幾個牌子？
Ni：LouisVuitton、MarcJacobs同RalphLauren，我好尊敬呢幾個牌子。

記：APE都屬於StreetFashion一種，你可唔可以講5個最鍾意嘅StreetLabel？
Ni：NoIdea。冇乜邊個StreetLabel特別鍾意，如果要我揀我會揀番自己個牌子。

記：APE咁多年來設計上嘅改變，好似猿人圖案嘅變化有冇咩特別意思？
Ni：Um...係一種進化，唔只係圖案上，好似啲衫多咗不同嘅迷彩款式，都係一種進化。

記：有好多人都讚APE嘅Marketing做得好好，可以將這個牌子定位，你有咩睇法呢？
Ni：其實我哋冇做過任何嘅Marketing，係一啲都冇，呢啲係大量售賣貨品嘅大公司宣傳手法。由頭到尾喺宣傳上面，我都處於好被動嘅位置，好多時都係雜誌搵我哋影相，如果有Marketing就變得有壓力。

■NIGO一向喜歡閃，所戴FrankMuller錶面竟然有個APE頭！

■佢有排鑽牙人所共知，可惜見佢兩次都未見到佢露兩口！

記：你的未來計劃——目黑傢俬店同BAPE飛機進展如何？
Ni：開目黑傢俬店係我嘅夢想，不過暫時仲係冇乜進展。而飛機呢個計劃都係好初步嘅想法，其實都未有任何構思，如果真係的話，我希望全架飛機都係APE嘅嘢。

記：嚟緊仲會唔會幫TeriyakiBoyz出碟，會唔會有機會安排在香港表演？
Ni：剛剛上星期先Release咗隻OfficialDVD，暫時未有打算在香港演出，如果有Offer會考慮吓。

記：呢一刻有乜好想做但又未做到？
Ni：其實有好多嘢都想做，有構思過，但𠵱家唔講得住，希望可以畀到驚喜大家。

MARTIN：「我個Friend5日前開始排隊，我都諗住博大霧，點知有人報警搞到入唔到。」

GG：「今日唔使旨意買到好嘢，不過係Fans都要嚟撐吓場。」

Jun：「我撐咗猿人有5年，今年15歲，以前阿葛搞得好好多，唔會好似今日咁混亂。」

3月30日晚BAPESTORE為慶祝開幕廣邀明星率先預覽新舖造勢，當晚每位嘉賓都有Party特別版Tee一件，仲要唔係個個入場都有份，街外冇得賣，十分矜貴。APE產品一向有炒賣潛力，今次Party特別版Tee包裝十分有心思，有金色錫紙壓縮成猿人頭外形，炒賣潛力爆燈。估唔到香港賣家動作更快，4月1日上YAHOO!已經有人放緊，雖然$1起價，其一賣家標明要將成交價乘100倍；另一賣家就有電話留低，小記打去一問，佢講到明個價去到$2,080就即賣。喂，你哋好似唔使錢攞返嚟㗎喎，使唔使咁狼呀！再講，當晚件Tee主要係派畀明星，邊個明星咁唔畀面又咁等錢使呀！